Според пишувањето на „Harper’s Bazaar“, 2026 година е прогласена за година на „отказ од инает“, а едно истражување покажува дека речиси една четвртина од вработените Британци оваа година планираат да ја сменат работата.

Сепак, психологот д-р Џорџ Сик ги предупредува сите кои во јануари размислуваат за импулсивно давање отказ. Како директор на консултантската компанија за работни места „eras“, тој вели дека чувството на незадоволство во овој период не е нужно знак дека треба веднаш да се замине.

„По долга и напорна година сосема е нормално да се почувствува порив сè да се напушти“, вели тој. „Но отказот во јануари често произлегува од емоции, а не од промислена одлука. Прегорувањето може да ви даде лажно чувство дека сè ви е јасно, а луѓето понекогаш ја мешаат потребата за одмор или промена во рамките на работата со потребата целосно да си заминат.“

Наместо да донесат избрзана одлука, д-р Сик советува вработените да си постават три прашања.

Дали сакате живот каков што го водат вашите надредени?

Д-р Сик препорачува пред донесување одлука да ја погледнете пошироката слика и да размислите каде ве води таа работа на долг рок. Прашува: „Дали им се восхитувате на луѓето над вас и на начинот на кој живеат, или нивната реалност во вас предизвикува одбивност?“

Многумина се заглавуваат во секојдневните обврски и не размислуваат каков живот ги чека ако останат на истиот пат. Затоа вреди да се обрне внимание на колегите и менаџерите: дали работат предолго, дали се постојано достапни и дали воопшто имаат време за приватен живот.

„Не сакате да се разбудите по неколку години и да сфатите дека со години сте работеле кон верзија на успех што всушност не ја сакате“, додава тој.

Можете ли вие да се промените дури и ако работата не се промени во следните 12 месеци?

Многумина чекаат условите на работа да се подобрат за повторно да „ја вратат волјата“. Д-р Сик предлага поинаков пристап: ако постои нешто што можете да го промените или да го развиете во рамките на постојната улога, можеби вреди да се обидете.

„Ако гледате простор за развој, поголема самодоверба или зајакнување на вештините, тоа може да биде знак дека работата сè уште може да ви даде нешто – дури и ако во моментот ви изгледа напорно“, вели тој.

Бегате ли само од непријатноста или навистина сте заглавени?

Непријатноста и повременото незадоволство се дел од секоја работа и не значат автоматски дека треба да си заминете. Д-р Сик објаснува дека растот често предизвикува непријатност, особено на почетокот на кариерата или кога минувате низ промени.

„Јануари дополнително може да ги засили тие чувства бидејќи имаме помалку енергија и природен пад на мотивацијата“, вели тој. Поради тоа, вообичаените притисоци на работа можат да изгледаат многу потешки отколку инаку.

„Ако ја напуштите работата само за да избегате од непријатноста, лесно е можно истите фрустрации да ги најдете и на новото место“, додава тој.

Кога навистина е вистинското време за отказ?

Според д-р Сик, вистинското време за отказ не е тогаш кога сте исцрпени и на работ на пукање.

„Вистинското време за давање отказ е кога можете јасно да објасните зошто си заминувате, а тоа да не е само последица на исцрпеност, огорченост или желба за бегство“, вели тој. „Ако вашите причини се смирени и конкретни, а не ‘веќе не можам’, поголема е шансата да повлечете потег што навистина ќе ви го подобри работниот живот.“

На крај, тој заклучува дека решението понекогаш не е нова работа, туку редефинирање на постојната улога или искрен разговор на работното место со поставување појасни граници.