Со популарност се стекнаа и „алтернативни“ дестинации, како Сардинија - шик замена за Сицилија.

Меѓутоа, како што годината се приближува кон крајот, сè повеќе патници веќе ги планираат одморите за следната година. Сонцето, убавата архитектура и активностите на отворено ќе бидат меѓу најбараните, заедно со растечкиот интерес за одржливи патувања и градови со посебна атмосфера.

Па кои се најдобрите дестинации за патување во 2026 година?

За култура, храна и архитектура: Брисел, Севиља и Прага

Брисел во 2026 година ќе биде една од најдобрите дестинации за љубителите на уметноста, благодарение на отворањето на музејот „Канал – Центар Помпиду“ кон крајот на годината, што се смета за почеток на голема културна ренесанса на градот. Градот нуди уникатна комбинација од историски шарм и современи, живописни содржини, потврдувајќи дека повеќе не е само попатна станица, туку дестинација сама по себе.

Во текот на 2026 година, Брисел ќе биде домаќин на бројни културни настани, како фестивалот „Bright Brussels“ во февруари, со осветлени рути и уметнички инсталации, потоа саемот „Art Brussels“ напролет и „Brussels Jazz Festival“ во јануари.

Посетете знаменитости како „Grand Place“ и „Atomium“, а потоа посетете го „Maison Antoine“ за прочуениот белгиски помфрит или „Maison Dandoy“ за легендарните вафли. Љубителите на антиквитети можат да најдат одлични парчиња во арт-деко квартови како Саблон, додека љубителите на стрипови ќе уживаат во Центарот за стрип (BD музеј).

За оние што доаѓаат првпат, централниот Брисел е идеален поради близината до знаменитостите и музеите, додека Саблон е одличен избор за љубителите на галерии и добра храна. Ако сакате улична храна и живи пазари, Сент-Жил е вистинскиот избор.

Севиља исто така се издвојува како една од атрактивните дестинации за 2026 година, пишува „Euronews“. Елегантните коктел-барови и креативните тапас-локали нудат модерен поглед на андалузиската кујна, во контраст со историските таверни. Уживајте во фламенко во неговиот роден град, раскошната маварска архитектура и знаменитостите како Севиљската катедрала и плоштадот Плаза де Еспања. Градот е домаќин и на големи манифестации, како пролетната Ферија де Абриљ и религиозната Голема недела.

Пробајте традиционални јадења како „patatas bravas“ и крокети, а не пропуштајте ја ни специфичната севиљска мармалада од горчливи портокали. За прв престој се препорачува квартот Барио Санта Круз, додека Тријана, од другата страна на реката е одличен избор за автентично локално доживување.

Прага е уште еден фаворит за 2026 година, позната по воодушевувачката архитектура и богатата култура. Градот со бајковита атмосфера се најде и на листата на најдобри градови во светот за 2026 година. Оваа година ќе биде домаќин на важни настани, како Прашкиот маратон, кој одбележува четири децении постоење, и 81. издание на фестивалот „Прашка пролет“.

Задолжително посетете го Стариот градски плоштад, Прашкиот замок и Карловиот мост, прошетајте низ ридестите улици и посетете ја Еврејската четврт. Тука се и статуата на Франц Кафка и прочуената „Куќа што танцува“.

Пробајте гулаш во ресторанот „Lokál“ и кнедли што го впиваат сосот, а за модерна кујна посетете го Карлин, додека уличните продавачи се неизбежни за слаткиот „chimney cake“. За прв престој идеален е Стариот град, додека Мала Страна нуди романтична атмосфера и бутик-хотели во мирни улици.

За сонце, песок и море: Албанија и Малта

Потоплите дестинации остануваат приоритет за Европејците и во 2026 година, а албанската ривиера се издвојува како една од најинтересните дестинации.

Земјата брзо се позиционирала како центар за авантури далеку од масовниот туризам, со недопрени крајбрежја и плажи како оние во Ксамил, кои често се споредуваат со најпознатите јужноевропски летувалишта.

Патниците можат да посетат УНЕСКО-локалитети како Националниот парк Бутринт и тврдината во Ѓирокастро, а потоа да истражуваат скриени заливи. Популарни се плажите Ксамил,“ Dhërmi“, „Jale“ и мирната Нарта.

Можни се и возења со брод, вклучително и еднодневен излет со траект до Крф, како и престој во Саранда, позната по шеталиштето и рестораните покрај море, во близина на Манастирот на 40-те свети маченици.

Пробајте свежи морски плодови, октопод и риба на скара, како и локални специјалитети како „byrek“ и домашна ракија. Ксамил е идеален за плажи, а Саранда за подобра поврзаност.

Малта исто така се наметнува како една од топ-дестинациите за 2026 година, благодарение на изобилството сончеви денови, плажи и богатата историја. Спојот од арапски, италијански и британски влијанија ја прави совршен избор за разновиден медитерански одмор.

Истражете ги улиците на Валета и градините „Upper Barrakka“, а потоа посетете го Националниот археолошки музеј. Во Мдина, „тивкиот град“, посетете ја катедралата Свети Павле и уживајте во панорамските погледи.

Капете се во „St. Peter’s Pool“ кај Марсашлок или отидете со траект до Гозо, каде ве чекаат Цитаделата во Викторија и „Inland Sea“. Пробајте „pastizzi“ и традиционален зајачки гулаш – „fenek“.

За ноќен живот изберете го Сент Џулијанс, за добра поврзаност Слиема, а за култура и архитектура – Валета.

За природа и авантура: Кападокија, Лапонија и Карпатите

Турската Кападокија се издвојува како дестинација за природа и авантура во 2026 година. Позната по летовите со балон, „самовилски оџаци“ и пештерските хотели, нуди спој на анадолски и турски традиции.

Истражете подземни градови, пешачете низ шарени долини и пештерски цркви, или пробајте параглајдинг. Во зима, снегот создава уште поспектакуларни глетки за возење со балон.

Лапонија е уште една топ-дестинација, особено затоа што почетокот на 2026 година е последна шанса да се види максимумот на поларната светлина. Сонцето е во фаза на соларна активност, што значи поинтензивни и почести аурори.

Освен поларната светлина, тука се и возења со санки со хаски, пешачење со снежни чевли, ирваси, моторни санки и риболов на мраз. Можно е и ноќевање во снежни хотели и стаклени иглуа, како и посета на селото на Дедо Мраз во Рованиеми.

Љубителите на природата можат да се насочат и кон Карпатите, еден од најдивите и најмалку истражени планински венци во Европа. Во 2026 година регионот се фокусира на еко-туризам и зачувување на дивиот свет.

Во Романија достапни се програми за заштита на мечките, додека Словачка го истакнува градот Тренчин, прогласен за Европска престолнина на културата за 2026 година. Посетителите можат да уживаат во пешачење, набљудување волци, мечки и орли, како и во термални бањи, планински велосипедизам и обиколка на автентични села и насликани манастири под заштита на УНЕСКО.