Освен што загрева и создава чувство на комфор, топлиот напиток може да ги ублажи симптомите како кашлица и болка во грлото. Одржувањето на хидратацијата е клучно за закрепнување, а чаевите без кофеин се идеален избор. Тие се богати и со полифеноли – растителни соединенија кои можат да го зајакнат имунолошкиот систем и да ја намалат веројатноста за разболување, пишува „Health.com“.

Зелен чај

Зелениот чај содржи катехини, вид полифеноли кои помагаат во борбата против вируси, бактерии и воспаленија. Истражувањата покажале дека редовната консумација на зелен чај може да помогне во превенција од грип. Една студија од 2015 година открила дека лицата кои пиеле зелен чај најмалку двапати неделно имале 61 отсто помал ризик од разболување.

За максимална корист се препорачува подготовка со вода загреана на околу 85 степени Целзиусови или подолго натопување во ладна вода. Доколку додадете малку лимон, ќе го засилите дејството на катехините. Сепак, имајте предвид дека зелениот чај содржи кофеин, па консумирајте го умерено за да не го наруши сонот.

Чај од ехинацеа

Ехинацеата е виолетов цвет познат по своите лековити својства. Содржи алкамиди – соединенија кои му помагаат на телото во борбата против воспаленија и вируси и го зајакнуваат имунитетот. Некои студии покажуваат дека препаратите од ехинацеа можат да спречат инфекции на горните дишни патишта.

Истражување од 2022 година покажало дека чајот од ехинацеа бил поефикасен против вируси отколку капсулите. Важно е да се спомене дека ехинацеата можеби не е безбедна за бремени жени и доилки, а лицата со алергии или хронични заболувања треба да се консултираат со лекар.

Чај од бозел

Темновиолетовите бобинки од бозел се богати со антоцијанини, силни антиоксиданси кои го зајакнуваат имунолошкиот систем и можат да го забават ширењето на вирусите. Преглед на истражувања од 2021 година покажал дека додатоците во исхраната од бозел можат да го скратат траењето на настинката и да ги ублажат нејзините симптоми.

Сепак, доказите за ефикасноста на самиот чај од бозел се ограничени. При подготовката е потребна претпазливост, бидејќи листовите, стеблата и незрелите бобинки од бозел се отровни.

Чај од камилица

Камилицата традиционално се користи за ублажување на настинка и кашлица поради своите противвоспалителни и антиоксидативни својства. Иако не постојат студии на луѓе кои директно потврдуваат дека чајот од камилица помага при настинка, докажано е дека го подобрува сонот. Бидејќи квалитетниот одмор е клучен за закрепнување, камилицата може индиректно да му помогне на телото да се избори со болеста.

Чај од ѓумбир

Ѓумбирот содржи соединенија наречени гингероли, за кои се смета дека помагаат во борбата против вирусите на грип, но тоа сè уште не е потврдено со истражувања на луѓе. Студиите покажале дека додатоците во исхраната од ѓумбир можат да ги намалат воспаленијата и да го заштитат телото со антиоксиданси.

Намалувањето на воспаленијата може да помогне во закрепнувањето, но директното влијание на чајот од ѓумбир врз настинката сè уште не е детално истражено.

Чај од лимон

Иако многумина веруваат дека чајот од лимон ги ублажува симптомите на настинка, за тоа нема научни докази. Лимонот е богат со витамин Ц, кој може да ја намали јачината на настинката, но самиот чај не содржи значајна количина од овој витамин.

Најдобар начин за внес на витамин Ц е консумирање свежо овошје. Сепак, чајот од лимон е одличен за хидратација, а за дополнителна корист во врелата вода едноставно исцедете свеж сок од лимон, пренесува „Index“.