Радикондоли, сместен на врвот на еден рид, го започнал овој проект за да привлече нови жители кои планираат долгорочен престој, пишува „Daily Mail“.

Издашни поттикнувања за новите жители

Важно е да се истакне дека оваа шема се разликува од популарните италијански програми за купување куќи за едно евро. Овде се работи за конкретна финансиска поддршка. Градоначалникот Франческо Гуаргуаглини за „CNN“ изјавил: „Шемата за домување, првично започната пред две години, сега се засилува.“

„Оваа година наменивме над 400.000 евра за поддршка при купување и изнајмување нови домови, заедно со други клучни мерки како финансиска помош за студенти, патници во јавен превоз и претплатници на зелена енергија“, додал тој. За сите кои ќе се пријават до крајот на декември 2025 и ќе се вселат почетокот на следната година, градоначалникот нуди и покривање на половина од киријата за првите две години.

Едноставен, но важен услов

Сепак, постои еден услов. За да се обезбеди долгорочно останување и оживување на заедницата, од новите жители се бара определена обврска. Купувачите на недвижности мора да се обврзат на престој од најмалку 10 години, додека за поднаемниците тој рок изнесува четири години.

Што нуди Радикондоли?

Во градот постојат многу празни куќи и недвижности кои градските власти сакаат да ги пополнат. Цените се движат од околу 50.000 евра за помали стамбени единици до 100.000 евра или повеќе за поголеми објекти. Тоа значи дека купувачот, со максимален бонус од 20.000 евра, помал стан би можел да добие за само 30.000 евра, наведува „CNN“. Кога станува збор за изнајмување, стан кој обично чини околу 400 евра месечно, со поттик ќе чини само 200 евра.

Овој средновековен град, оддалечен само еден час од Фиренца, зрачи со автентичен тоскански амбиент. Со камени улици, живописни премини и прекрасен поглед, Радикондоли е идеална база за активности на отворено како пешачење и возење велосипед. Исто така, се гордее со бројни историски градби, древни рушевини и прекрасна црква, а поради блискоста со Сиена нуди и одлични можности за еднодневни излети.

Проект кој веќе дава резултати

Целта на оваа иницијатива е јасна – оживување на локалната заедница. Според официјалните страници на градот, проектот веќе покажал успех: „Кога проектот започна, бројот на жители изнесувал околу 900, а сега се зголемил на 960. Затоа, политиката за поддршка на семејства, создавање услуги, поттикнување на културата и социјалната интеракција, како и поддршка на патниците, се базира на постигнатите резултати. Целта е да се понудат можности за подобрување на квалитетот на животот на луѓето, да се поттикне економскиот и стамбениот развој, како и да се повикаат нови пријатели да се приклучат на заедницата, со посебен акцент на младите.“