Комбинацијата на мебел од природни материјали ја прави куќата топла и пријатна, толку многу што во тој момент не би посакале ништо друго освен да испиете шолја топол чај во текот на студените денови.
Планинската куќа на Том Круз во Колорадо крие вистинска мала дизајнерска приказна со топли тонови и рустикални детали споени така што таа станува вистинско мало прибежиште во текот на студените зимски денови.
Дневната соба на славниот актер е уредена во духот на луксузна дневна колиба и претставува идеален пример како просторот може да биде удобен, безвременски и препознатлив.
Она што ја прави уште поинтересна е фактот што атмосферата на тој ентериер лесно може да се пренесе и во секој семеен дом.
Веќе на прв поглед, неговиот ранч изгледа како место од бајките. Пространата дневна соба е исполнета со мека софа, големи дрвени греди и голем камин којшто доминира во просторот и потсетува на сцена од некој романтичен филм.
Вистинската магија на овој дом се крие во природните текстури, смирувачки тонови и старински акценти. Сѐ заедно создава простор којшто делува топло, пријатно и автентично. Токму затоа тоа е идеално место за мирни вечери, разговори и опуштање после напорен ден.
Слоевитиот текстил дополнително го зголемува впечатокот на планински амбиент. Топлите, плетени ќебенца, традиционално дизајнираните перничиња и смирените тонови и мотиви инспирирани од југозападниот стил внесуваат доза традиција и визуелен шарм. Овие детали внесуваат мекост и динамика дури и во простор каде доминираат дрвото и кожата.
Внимателно бираните украси, стари книги, керамички вазни, рустикални свеќници ја чуваат рамнотежата меѓу естетиката и функционалноста и на просторот му даваат чувство дека е „жив“, но без нарушување на елеганцијата.
