Осомничен за убиството е Анис Калајџиќ (33), фудбалски судија во Првата лига на Федерацијата БиХ, а медиумите пренесуваат дека станува збор за син на познат фудбалер на Вележ.

Она што особено ја шокираше јавноста беа деталите за ова мачно убиство. Имено, мажот ја следел девојката од автобуската станица, ја стигнал и ја застрелал до смрт во угостителски објект.

Според информациите, жената трчала од правец на автобуската станица, а напаѓачот ја следел со автомобил. Кога видел дека влегува во ресторанот, го оставил возилото „Форд“ на околу 50 метри и ја следел. Девојката успеала да истрча до тоалетот, каде што напаѓачот ја пронашол и ја застрелал.

Наводно, тој се обидел да се самоубие, но пиштолот се заглавил. Бидејќи несреќната девојка претходно се јавила во полиција, патролата дошла на местото на настанот за две минути, каде што го уапсиле.

Добивала закани

Истрагата ја водела дежурната кантонална обвинителка на Обвинителството на Херцеговачко-неретванскиот кантон, Весна Прањиќ, која рекла дека, според досега собраните информации, несреќната девојка, на која бил поранешно момче, претходно добивала закани кои, за жал, не ги пријавила од причини што познати нејзе само, мислејќи, веројатно, како што навела, дека ќе заврши со закани.

„Меѓутоа, вечерва кога се упатила во теретана, тој ја пречекал и физички ја нападнал, по што извадил пиштол. Таа истрчала кон хотелот обидувајќи се да се спаси, но тој влегол и ја убил“, рекла Прањиќ.

На прашањето дали напаѓачот се обидел да изврши самоубиство, таа одговорила дека оваа информација за сега не е потврдена. „Без докази за тоа, не можам ништо да кажам“, изјавила Прањиќ, апелирајќи до медиумите да известуваат одговорно за овој случај.

Истражителите на местото на настанот ги прегледале и снимките од видеонадзорот пред и внатре во објектот. Биле извршени разговори и со сведоци.

Како што дознава „Vecernji.ba“, осомничениот неодамна пријавил пиштол, а како причини за пријавата наведува безбедносни причини, бидејќи, како што рекол, му се закануваат како фудбалски судија.

Познаниците се збогуваат

Многу познаници, роднини и пријатели се опростуваат од убиената девојка, а меѓу нив е и економистот Адмир Чавалиќ, кој ја познавал.

„Тешко е да се најдат зборови за нечија смрт. Уште потешко ако таа личност била помлада од тебе, студентка, личност која те викала ментор. Од првите едукации, организирање на настани, меѓународни патувања, читање на една, друга, трета, педесетта книга па сè до пишување заеднички научни трудови и глобални проекти. Деценија работа и растење. Кога гледаш како студент учи, работи, се развива во силна индивидуа. Таа личност беше Алдина Јахиќ, „филозоф“ како што ја нарекував. Филозофот вечерва се обидел да побегне од насилникот, будалата, некаков слабак без кичма“, рекол Чавалиќ.

Говорел и за нејзините организациски способности.

„Алдина можеше да организира настан за 1.000 луѓе, да пишува десетици трудови, да зборува пред полна сала, течно на англиски, да зборува за БиХ и да се шегува. Можеше да направи сè, така ја гледав. Но вечерва не успеа да побегне. Продолжи понатаму драга филозофко. Рахмет на босанската душа, искрено сочувство до семејството Јахиќ“, заклучил Чавалиќ.

Осомничениот брзо уапсен

На местото на настанот бил и министерот за внатрешни работи на ХНК, Марио Мариќ, кој потврдил дека се преземени опсежни истражни дејствија под надзор на дежурниот обвинител. „Осомничениот беше лишен од слобода за само неколку минути и е под полициски надзор. Ова е трагичен случај, навистина, и ја користам оваа прилика да изразам сочувство на семејството“, рекол Мариќ.

Тој додал дека Обвинителството ќе одлучи за квалификацијата на кривичното дело. „Што се однесува до квалификацијата на кривичното дело, тоа ќе го одлучи Обвинителството во кој правец ќе оди. Се чини дека за сега има многу доказен материјал“, заклучил министерот.