Трите јапонски гиганти го насочуваат фокусот кон Индија, во обид да ја намалат зависноста од Кина и да го искористат огромниот потенцијал на третиот по големина автомобилски пазар во светот.

„Toyota“, најголемиот светски производител на автомобили, и „Suzuki“, кој доминира на индискиот пазар со речиси 40% удел, најавија одвоени инвестиции вредни вкупно 11 милијарди долари, со цел да ги зајакнат производните и извозните капацитети во земјата.

Во меѓувреме, „Honda“ минатата недела соопшти дека Индија ќе стане нејзина централна база за производство и извоз на електрични автомобили.

Индија станува магнет за автомобилската индустрија

Ниските трошоци за работа и огромната работна сила одамна ја прават Индија привлечна дестинација за производителите. Но сега, кога јапонските брендови постепено се оддалечуваат од Кина, Индија станува нивниот природен избор.

Дополнителна предност е што Индија речиси целосно ги ограничува кинеските електрични возила, што значи дека јапонските компании засега немаат конкуренција од „BYD“ и слични марки.

Жестоката ценовна војна меѓу кинеските производители на електрични возила драстично го намали профитот во Кина, додека кинеските брендови сè повеќе настапуваат на странските пазари и им одземаат дел од пазарот на јапонските ривали во Југоисточна Азија.

„Индија е одлична замена за Кина“, вели Џули Бут од „Pelham Smithers“, објаснувајќи дека профитните маржи во Кина се премногу ниски.

„Во моментов, Јапонците ја гледаат Индија како многу подобра опција — затоа што не мора да се натпреваруваат со кинеските производители“, додава таа.

Поддршка од владата и раст на инвестициите

Според аналитичарите, квалитетот на индиското производство забележливо се подобрува, а владата на Нарендра Моди активно ги поттикнува странските вложувања преку програми за субвенции и даночни олеснувања.

Јапонските директни инвестиции во индискиот транспортен сектор пораснаа повеќе од седум пати меѓу 2021 и 2024 година, достигнувајќи 294 милијарди јени (околу 2 милијарди долари) во 2024 година.

Во исто време, вложувањата во кинескиот транспортен сектор паднале за 83%, на само 46 милијарди јени.

„Toyota“ оди локално

„Toyota“ тесно соработува со јапонски и индиски добавувачи за да ги намали трошоците и да ја зголеми домашната продукција на хибридни делови, чиј недостиг се почувствува оваа година поради зголемената побарувачка.

„Моделите сега се дизајнираат според локалните барања — повеќе не се работи за глобални спецификации“, објаснува еден од добавувачите.

Според агенцијата „Reuters“, „Toyota“ планира до крајот на деценијата да претстави 15 нови или обновени модели во Индија, како и да ја прошири мрежата на дилери во руралните региони. Целта е до 2030 година да заземе 10% од пазарот на патнички автомобили, во споредба со сегашните 8%.

„Индија е исклучително важен и растечки пазар“, изјави Коџи Сато, претседател на „Toyota“, на минатонеделниот саем во Јапонија.

Минатата година, компанијата најави инвестиција од над 3 милијарди долари за проширување на фабриката на југот на Индија и изградба на нова фабрика во државата Махараштра, која треба да започне со работа пред 2030 година.

Со тоа, вкупниот капацитет на „Toyota“ во Индија ќе ја надмине бројката од еден милион автомобили годишно.

Владата на Моди ја турка индустријата

Индиската економија во последните три фискални години расте со просечна стапка од 8%, а владата на премиерот Нарендра Моди има за цел да го задржи тој замав преку привлекување странски производители и стимулирање на домашното производство и извозот.

Минатата година во Индија се произведени околу пет милиони патнички автомобили, од кои 800.000 се извезени, а остатокот е продаден на домашниот пазар.

Продажбата во земјата порасна за 2%, а извозот за 15%.

Фактот што Индија ограничува кинески инвестиции дополнително им користи на јапонските компании, бидејќи им го олеснува настапот без силна кинеска конкуренција.

„Индискиот протекционизам кон соседите е, во суштина, скриен благослов за јапонските производители“, вели Гаурава Вангал од „S&P Global Mobility.“

„Така гледаат реална шанса да го прошират присуството во Индија и да ја подобрат својата конкурентност“, додава тој.

Домашната конкуренција расте

Домашните брендови „Tata Motors“ и „Mahindra & Mahindra“ значително ја проширија понудата на SUV модели, со што му одзедоа дел од пазарот на „Suzuki“.

Пред пандемијата, „Suzuki“ контролираше речиси 50% од индискиот пазар, нешто што "Ford" и "General Motors" не успеаја да го постигнат — и на крајот се повлекоа од земјата.

Плановите на „Honda“ и „Suzuki“

За „Honda“, Индија веќе е најголем пазар за мотоцикли, но компанијата сега има цел да го засили своето присуство во автомобилскиот сектор.

„Трите клучни пазари за ’Honda‘ се САД, Индија и Јапонија“, изјави извршниот директор Тошихиро Мибе на саемот во Токио.

Планот е Индија да стане производна и извозна база за еден од електричните модели од новата ’Zero‘ серија, кој од 2027 година ќе се извезува во Јапонија и другите азиски земји.

Во меѓувреме, инвестицијата на ’Suzuki‘ од 8 милијарди долари ќе овозможи зголемување на локалната продукција на 4 милиони автомобили годишно, во споредба со сегашните 2,5 милиони.

Нејзината подружница „Maruti Suzuki“ е убедливо најпродаваниот бренд и најголемиот извозник на автомобили во Индија.

„Нашата цел е Индија да стане глобален производствен центар на ’Suzuki‘“, изјави претседателот Тошихиро Сузуки за време на саемот.

„Сакаме дополнително да го зголемиме извозот од Индија“, додаде тој.

Јапонија, очигледно, го гледа истокот не кон Кина – туку кон Индија.

И овојпат, економската судбина на азискиот континент можеби повторно се пишува – само со нова адреса.