Што точно се случило?

За време на непријатен говор пред натпреварувачките, кој на 4 ноември се пренесувал во живо на „Фејсбук“, тајландскиот бизнисмен Науат Ицарагрисил ја прозвал Бош за наводно неисполнување на нејзините промотивни обврски. Додека таа се обидувала да ја објасни ситуацијата, Ицарагрисил ја прекинал, ја нарекол „глупава“ и на крај побарал од обезбедувањето да ја отстрани од настанот.

„Мексико, каде си?“, прашал откако неколку минути упатувал забелешки кон ненаведена натпреварувачка. Кога Бош станала, продолжил: „Слушнав дека одбивте да објавувате содржини за Тајланд. Дали тоа е вистина?“. Во еден момент изјавил пред сите натпреварувачки: „Ако ги следите наредбите на вашиот национален директор, тогаш сте глупави“.

Бош му возвратила: „Не ме почитувате како жена“, по што тој повикал обезбедување, што предизвикало гласно негодување и извици „не“ од останатите натпреварувачки.

На снимките објавени на социјалните мрежи се гледа како неколку мисици, меѓу кои и актуелната „Miss Universe“, Данката Викторија Кјер Теилвиг, го напуштиле настанот во знак на протест. Мис Мексико, по заминувањето, потврдила дека Науат навистина ја нарекол „глупава“.

Инаку, Ицарагрисил, тајландски бизнисмен, е претседател на „Miss Grand International“, како и потпретседател за Азија и Океанија во рамките на организацијата „Miss Universe“.

Остра реакција на организацијата „Miss Universe“

Организацијата истиот ден објавила видео во кое претседателот Раул Роча Канту остро ги осудил „злобните постапки“ на Ицарагрисил кон Бош.

„Сакам јасно да го изразам моето длабоко негодување кон Науат за јавниот напад што го изврши против Фатима Бош“, изјави Канту, додавајќи дека Ицарагрисил „ја понижил, ја навредил и покажал недостиг на почит, со сериозно малтретирање преку повикување обезбедување за да заплаши беспомошна жена, обидувајќи се да ја замолчи и да ја исклучи“.

„Науат, мораш да престанеш“, му порача Канту, нагласувајќи дека Ицарагрисил постапувал од „својата постојана желба да биде во центарот на вниманието“. Како резултат на инцидентот, неговото учество во понатамошните активности е „сведено на минимум“, а најавени се и „корпоративни и правни мерки“.

Поддршка за мисицата на Мексико

Набргу по инцидентот, се огласила и самата Фатима Бош. „Сакам да ѝ порачам на мојата земја — не се плашам да го кренам својот глас“, изјавила таа. „Во 21 век сме, и јас не сум кукла што може да се шминка, фризира и облекува по желба. Дојдов овде да бидам гласот на сите жени и девојки што се борат за своите цели“.

Поддршка ѝ упатила и мексиканската организација на изборот. „Она што денес ѝ се случи на Фатима во Тајланд е неприфатливо. Ниту една жена, под никакви околности, не заслужува да биде навредена или понижена“.

Актуелната „Miss Universe“, Викторија Кјер Теилвиг, на „Инстаграм“ напиша: „Засекогаш горда на мојата Фатима. Доста е — нашите гласови ќе се слушнат гласно и јасно!“.

Подоцнежно извинување

Ицарагрисил подоцна се јавил преку пренос во живо на „ТикТок“ за да се извини. „Ако некој се почувствувал лошо, ако некој се почувствувал непријатно... им се извинувам на сите“, рекол тој, признавајќи дека можеби дошло до недоразбирање во комуникацијата.

И покрај извинувањето, скандалот фрли сенка врз подготовките за финалето на изборот за „Miss Universe 2025“, што ќе се одржи на 21 ноември во Пак Крет, Тајланд, со учество на 122 делегатки.