Орце Ѓорѓиевски се повлече од вечерашната дебата со Амар Мециновиќ: „Јасна е сликата за двајцата кандидати“; Левица: „Бега од дебата без тутор и подметнати прашања“

Во објавата Ѓорѓиевски наведува дека вечерва во тој термин ќе биде на завршниот митинг од неговата кампања во Скопје.

Тој смета дека по претходната дебата меѓу него и Мециновиќ што се одржа во вторникот „станале јасни ставовите и јасна е сликата за двајцата кандидати“.

„Евидентно е ниското ниво на политичка култура, но и присутната безидејност и недостигот на планови кај кандидатот Амар Мециновиќ, што значи дека секоја следна дебата не би била натпревар и судир на концепти, туку судир меѓу концепт за Скопје, претставуван од мене и ВМРО-ДПМНЕ и демагогија, празна реторика и отсуство на план што се карактеристики на Амар Мециновиќ“, напиша Ѓорѓиевски и додаде дека целосно ја почитува „намерата и професионалноста на телевизијата која испрати покана за дебата“.

Претходно од Левица објавија статус на Фејсбук во кој напишаа дека Орце кој „уверуваше дека „не бега и не се плаши од дебати со Мециновиќ” – не смогна храброст да се појави на нормална, специјално неисценирана, ненаместена, непристрасна дебата без подготвени прашања и одговори со кандидатот од Левица“.