Членовите на здружението „Еко Фазан“ од Кичево имале ретка и впечатлива средба со два риса во селото Новосело, кичевско.
Од здружението истакнуваат дека најверојатно се работи за мајка со младенче. Еден од рисовите им се приближил доволно блиску за да го документираат овој уникатен момент, кој ја нагласува разновидноста и богатството на биодиверзитетот во овој регион.
Балканскиот рис (Lynx lynx balcanicus) е подвид на евроазискиот рис и се наоѓа исклучиво во планинските подрачја на Балканот, пред сè во западна Македонија, Албанија и делови од Косово. Тој се смета за најголемата дива мачка на Балканот и е национален симбол на Македонија, прикажан на реверсот на петденарската монета.
Што се однесува до териториите, балканскиот рис има слични навики како и другите подвидови. Мажјаците го покриваат поголемото подрачје (220–700 km²), додека женките се движат во помали територии (100–200 km²), кои се преклопуваат за време на парењето. Младенчињата се раѓаат во доцна пролет, помеѓу мај и јуни, откако мајката ги носи околу 70 дена.
Балканскиот рис е месојад, а главната храна му се мали копитари, како срна (Capreolus capreolus) и дивокоза (Rupicapra rupicapra). Дивиот зајак (Lepus europaeus) служи како алтернативен плен, особено во подрачја каде копитарите се поретки. Успешното размножување и опстанокот на рисот зависи од достапноста на пленот и квалитетот на неговото живеалиште.
Здружението „Еко Фазан“ повеќепати досега потврдило дека рисовите се автохтони за оваа територија.
