Станува збор за новооткриен свет со назив GJ 251c, оддалечен на само 18 светлосни години од Земјата – речиси на нашиот космички праг.

Според новите анализи, планетата има маса од околу 3,8 пати повеќе од Земјата и се наоѓа во зоната на својата матична ѕвезда, што значи дека на нејзината површина би можела да постои вода – клучен предуслов за живот.

Како што објаснува астрономот Суврат Махадеван од Универзитетот Пенсилванија Стејт, планетата се наоѓа на „вистинска оддалеченост од својата ѕвезда“.

„Доколку има соодветна атмосфера, GJ 251c би можела да задржува вода, што ја прави особено интересна за понатамошни истражувања“, пишува „Science Alert“.

Научниците истакнуваат дека потрагата по живот вообичаено почнува со два основни услови – карпеста планета и положба која овозможува на неа да има вода. Таквите планети се реткост, а да се пронајде една таква која е близу до Земјата е вистинско откритие.

Планета во нашето соседство

„Во астрономски размери, 18 светлосни години значи дека GJ 251c е речиси наш сосед“, вели Пол Робертсон од Универзитетот Калифорнија. Планетата кружи околу црвено џуџе GJ 251, ѕвезда која е околу три пати помала од Сонцето и многу поладна, што значи дека зоната е значително поблиска.

Истражувачкиот тим под водство на Кореј Беард со години ја набљудувал таа ѕвезда во потрага по планети со мала маса.

Веќе е познат еден свет – GJ251b, „супер-Земја“ со орбита од само 14 дена. Но, во новите набљудувања астрономите се соочиле со еден сигнал – планета која кружи на секои 53,6 дена, поточно во внатрешноста на својата зона.

Користејќи ги податоците добиени во работа повеќе од 20 години и нови инструменти со висока резолуција, научниците ги следеле ситните поместувања на ѕвездата предизвикани од гравитацијата на нејзините планети.

Резултат: Цврсти докази за постоење на друг свет – GJ 251c. Сѐ уште малку се знае за неговиот состав затоа што планетата не поминува пред својата ѕвезда, што го отежнува мерењето на големината и атмосферата.

Сепак истражувачите веруваат дека GJ 251c е одличен кандидат за идни набљудувања.

„Иако откритието е многу ветувачко, сѐ уште работиме на потврда. Потребни се нови внимателни и напредни телескопи за со сигурност да знаеме што се случува таму“.