Телото што Хамас вчера му го предаде на Израел не му припаѓа на ниту еден од заложниците, туку на Палестинец од Газа, изјави за израелските медиуми функционер за безбедноста. Останатите три тела се идентификувани како Тамир Нимроди, Еитан Леви и Уриел Барух.
Портпарол на Хамас: Работиме на враќање на телата
Портпаролот на Хамас, Хазем Касем, изјави дека Хамас „работи на исполнување на своите обврски“ за враќање на телата на израелските војници, што израелските медиуми го протолкуваа како индиректно признание на израелските обвинувања дека Хамас го прекршил договорот.
Неговата изјава дојде откако Хамас му предаде на Израел тело кое не му припаѓало на ниту еден од заложниците. Израел сè уште чека враќање на 21 тело.
Касем додаде дека Израел „направил сериозно прекршување на договорот кога убил цивили во Шеџаја и Рафа“ и ги повика медијаторите „да го принудат Израел да се придржува до своите обврски“.
