Компанијата „Paramount Global“ соопшти дека по 44 години постојано емитување, „MTV“ ќе биде трајно згаснат на 31 декември 2025 година, пишува „Euronews“.
Ќе бидат исклучени пет популарни канали: „MTV Music“, „MTV 80s“, „MTV 90s“, „Club MTV“ и „MTV Live“ – најпрвин во Обединетото Кралство и Ирска, а потоа и во Франција, Германија, Австрија, Полска, Унгарија, Австралија и Бразил.
Оваа одлука е донесена во рамки на агресивните мерки за штедење на „Paramount Global“ која оваа година се спојува со „Skydance Media Group“.Покрај финансиската реалност, овој потег ги одразува и драстичните промени во навиките за гледање и консумирање медиуми, бидејќи љубителите на музиката одамна се свртеа кон дигиталните платформи.
Социјалните мрежи и стриминг сервисите претставуваат силна конкуренција, а телевизиските канали повеќе не можат да се натпреваруваат со поперсонализираните начини на уживање во музиката.
Затворањето на „MTV“ става крај на поп-културното наследство што започна во САД во 1981 година. Пророчки, првото видео што го емитуваше „MTV“ беше „Video Killed The Radio Star“ од групата „The Buggles“.
Оттогаш беа домаќини на премиерите на најголемите спотови во тоа време, вклучувајќи ги „Thriller“ на Мајкл Џексон и „Smells Like Teen Spirit“ на Нирвана, а го емитуваа и првото реалити шоу „The Real World“ во почетокот на 90-те.
Откако „MTV“ ги помина првите години од емитувањето во САД, каналот пристигна во Европа во 1987 година. Емисиите како „MTV Unplugged“ наскоро станаа култни, промотивните музички видеа беа претворени во вистински уметнички дела, а „MTV“ беше главна платформа за лансирање нови музички ѕвезди и маркетинг на нови модни трендови.
Сепак, до 2010-те, традиционалната музичка телевизија почна да заостанува зад социјалните мрежи и стриминг сервисите.
Брендот „MTV“ ќе продолжи да постои преку дигитални платформи и препознатливи настани како што се VMA и EMA наградите, но на последниот ден од 2025 година, музичката телевизија каква што генерациите ја знаеја ќе престане да постои.
