Истражувачи од Јужна Кореја развија нова технологија што ја користи сончевата светлина за испарување на морската вода и производство на чиста вода за пиење.
Наместо да се потпира на надворешна електрична енергија, овој пристап применува технологија на соларна десалинизација.
Системот, кој го разви истражувачкиот тим од Националниот институт за наука и технологија во Улсан („UNIST“), ги решава вообичаените проблеми како акумулацијата на сол.
Оваа технологија нуди одржливо решение за производство на питка вода.
Процесот носи минимални емисии на јаглерод диоксид благодарение на користењето на сончевата енергија, а методот се базира на „La0.7Sr0.3MnO3“ – оксиден перовскит што делува како високо ефикасен фототермален материјал.
Истражувачите истакнуваат дека оксидниот перовскит ја претвора соларната енергија во топлина преку создавање на интра-појасни замки („trap states“). Тоа овозможува нерадијациска рекомбинација на електрони и празнини, со што се засилува ослободувањето на топлината преку термализација.
Тимот развил уред што го надминува предизвикот со акумулација на сол. Дизајнот овозможува еднонасочен проток на течност, создавајќи градиент на сол кој ја потиснува до рабовите на фототермалниот материјал, значително намалувајќи го загадувањето и обезбедувајќи заштита од светлина.
„Со овој иновативен дизајн се постигнува импресивна брзина на соларно испарување под дејство на сончевите зраци, како и револуционерен пристап за подобрување на ефикасноста и трајноста на соларната десалинизација преку напредно инженерство на материјали и „паметен“ дизајн“, наведуваат истражувачите во студијата објавена во списанието "Advanced Energy Materials".
Д-р Сореј Чаула, главен автор на студијата, истакна дека испарувачот во форма на обратно латинично „L“ нуди одржлив пристап кон производството на питка вода и има потенцијални примени во еколошки прифатливо обновување на ресурсите, како што е собирањето сол.
