Манчестер Јунајтед остави добри подготовки зад себе и остави далеку посериозен впечаток, но стартот на новата сезона во Премиер лигата не донесе ништо ново за Рубен Аморим и неговите фудбалери.
Иако имаше добра претстава против Арсенал, Јунајтед загуби во првото коло на домашен терен и остана без освоен бод, додека во второто одигра 1:1 против Фулам во натпревар во кој значително опадна со темпото во финишот од средбата.
Аморим самиот нагласи дека ќе мора да работи на психолошкиот аспект откако неговиот тим ќе поведе на еден натпревар, но легендите на клубот веќе јасно му посочуваат дека ќе мора да купи нов голман доколку сака поголема сигурност во одбраната.
Гери Невил му ги посочи Донарума и Мартинез како опции за кои вреди да се проба, а Рио Фердинанд вели дека нема воопшто доверба во Алтај Бајиндир, голманот кој доби предност пред Андре Онана на стартот на сезоната.
– Изгледаме несигурно и тоа не е добар сигнал. Голманот не ми влева доверба и тоа мора да се каже искрено. Имаше една добра одбрана против Фулам во дуелот со Џошуа Кинг, но изгледа многу несигурно при прекини. Тој покажува голема несигурност при нафрлени топки кои носат 50-50 ситуации.
– Тоа се пренесува и врз останатите. Покрај голманот, доста несигурно делува и цела дефанзивна четворка. Треба да се опушти и да изгледа поживо, но ќе стекне самодоверба само ако тренира вакви ситуации секој ден во тренинг центарот со своите соиграчи, – вели Фердинанд.
