Ханси Флик имаше извонредна премиерна сезона во Барселона и успеа да освои три големи трофеи, но самиот е свесен дека во втората притисокот ќе биде уште поголем после добрите резултати остварени во изминатите 12 месеци.
Германскиот стручњак беше избран за тренер на годината од германски „Спорт Билд“ и беше дел од церемонијата во Хамбург, а враќањето во родната земја го искористи за да испорача и една посебна пофалба за фудбалерот кој неверојатно порасна со него во изминатата година.
Ламин Јамал од тинејџер прерасна во блескаво момче кое неодамна наполни 18 години, а Ханси е убеден дека со идентична посветеност и залагање како таа што ја прикажува досега, новата „десетка“ на Барса ќе прерасне во еден од најдобрите играчи на сите времиња.
– Не може да се спореди ниту еден играч со друг, ниту пак актуелен играч со некој од друга ера. Ламин е вистински гениј во тоа што го прави.
– Специјално е што тоа го прави на 18-годишна возраст, тој веќе сам одлучува натпревари. Тој е надобар пат и навистина се работи за многу интелигентно момче. Има само 18 години и се уште може многу да учи од другите. Ние сме му голема поддршка и убеден сум дека ќе биде еден од најдобрите играчи во историјата, еден од најдобрите кои воопшто сме ги гледале во фудбалот, – смета Ханси.
