Хенри Кавил изгледаше беспрекорно во класично црно смокинг одело со пеперутка машна, додека неговите сега подолги и виткани прамени уште повеќе ја истакнаа неговата впечатлива појава. Актерот веќе извесно време пушта коса, па ова издание беше значително поопуштено и поприродно од претходните појавувања.

Неговата идна сопруга Натали, од друга страна, не доби ни приближно толку комплименти како нејзиниот партнер. Таа носеше елегантен, драпиран сатенски фустан во нежна праскова боја, комбиниран со златни сандали со ремчиња. Посебно внимание привлече нејзиниот свршенички прстен, кој со гордост го покажа додека позираше покрај Хенри. Парот изгледаше вљубено и опуштено, разменувајќи насмевки додека позираа за фотографите и фановите.

Сепак, можеа да се прочитаат и коментари дека фустанот „изгледа како да облекла постелнина“, како и дека „Хенри изгледа како милион долари, а таа како два динари“. Ова, сепак, не се првите критики што Натали ги добива од бројни фанови на нејзиниот славен свршеник – и порано имаше коментари дека актерот „морал да најде поубава жена“. Сепак, тие не се грижат за злобните јазици и уживаат во својата љубов и во новиот член на семејството.

Парот го доби своето прво дете

Инаку, за време на вечерта, Хенри се појави на сцената за да го претстави познатиот холивудски продуцент Чарлс Ровен, на кого таа вечер му беше доделена награда. Кавил го прочита говорот и изгледаше исклучително расположен, што многумина го поврзаа со радоста поради неодамнешните промени во приватниот живот.

Имено, парот годинава го доби своето прво дете. Веста за бременоста беше откриена во април 2024 година, кога Хенри и Натали потврдија дека очекуваат бебе, а раѓањето уследи недолго потоа. Иако својот приватен живот внимателно го чуваат од јавноста, Кавил во јуни минатата година, по повод Денот на татковците, објави трогателна објава на Инстаграм која насети дека семејството ќе се зголеми.

„Среќен Ден на татковците на сите татковци! Изгледа дека наскоро ќе им се придружам на вашите славни редови! Имате ли некој совет?“, напиша тогаш Хенри, со фотографија на која лежи покрај детско креветче. Во својот препознатлив духовит стил додаде: „Не грижете се, перница нема да има во креветчето кога ќе стигне малото – само лепак и скалпели, за да може да прави Warhammer минијатури.“

Во интервју за „Access Hollywood“ во април, на премиерата на филмот „The Ministry of Ungentlemanly Warfare“ во Њујорк, Хенри откри колку му значи оваа нова животна улога.

„Многу сум возбуден. И Натали и јас со нетрпение очекуваме. Сигурен сум дека наскоро ќе слушнете многу повеќе за тоа.“

Заедно се 4 години

Хенри и Натали првпат јавно ја потврдија својата врска во април 2021 година. Оттогаш, најчесто ја држат подалеку од медиумите. Веста за свршувачката се појави на почетокот на 2025 година кога беа забележани заедно во Австралија, како шетаат по крајбрежјето на Голд Коуст. При таа пригода, Натали туркаше детска количка, а на нејзината рака сјаеше голем дијамантски прстен кој веднаш ги поттикна шпекулациите за свршувачката.

Иако сè уште нема официјални информации за свадба, се шпекулира дека наскоро може да има големо соопштение. Парот, и покрај славата, се труди да ја зачува приватноста, но ваквите појавувања се јасен доказ дека уживаат во заедничкиот живот и новата улога како родители.

Хенри во последните месеци направи пауза од јавни настани и снимања за да се посвети на семејството, па со ова последно појавување пријатно ги изненади своите фанови.