Сем Алтман, директорот на "OpenAI", неодамна го шокираше светот со објава на блог во која тврди дека развојот на општата вештачка интелигенција (AGI) е сега неизбежен и дека човештвото веќе ја преминало „точката без враќање“. Според него, иако напредокот изгледа постепено, тој во иднина ќе се чувствува како вистинска технолошка експлозија.

Алтман истакнува дека станува збор за долг и сложен процес кој нема да има еден спектакуларен момент, туку сингулацијата и напредокот ќе се случуваат „чекор по чекор“. Со ваквото темпо, човештвото за неколку децении ќе го промени од темел начинот на кој живее и работи.

Роботи што создаваат роботи!

Една од највпечатливите прогнози на Алтман се однесува токму на роботите. Тој верува дека до 2027 година, роботите ќе бидат способни сами да произведуваат нови роботи, што би можело да доведе до експоненцијално забрзување на производството и технолошкиот развој.

За да го постигнат тоа, роботите ќе треба да бидат хуманоидни, бидејќи светот е прилагоден на човечкиот облик и функциите што ги извршува човекот. Алтман нагласува дека ваквиот синџир на самостојно производство ќе ја трансформира целата индустрија – од ископување суровини, преку возење камиони, до управување со фабрики.

Работните места исчезнуваат, доаѓа ера на огромно богатство

Алтман предупредува дека автоматизацијата и вештачката интелигенција ќе доведат до губење на многу работни места, но воедно и дека економскиот просперитет ќе достигне нивоа невидени досега. Од една страна не очекува сериозна општествена трансформација, но од друга – отворање на можности што порано биле незамисливи.

Според него, забрзаниот технолошки напредок ќе им овозможи на луѓето да се прилагодат и да научат нови вештини, додека глобалното богатство ќе расте толку брзо што ќе се создадат услови за нови политики и концепти со кои може да се решат многу актуелни проблеми.

Суперинтелигенција за сите – револуција на достапноста и слободата

Алтман нагласува дека еден од клучните приоритети денес е суперинтелигенцијата да стане евтина, достапна и да не биде концентрирана во рацете на малкумина – било да се работи за поединци или корпорации. Ова, според него, би овозможило вистинска демократизација на моќта што ја носи вештачката интелигенција.

За да се постигне тоа, потребно е најпрво да се реши „проблемот на усогласување“ – односно, AI системите да бидат во согласност со колективните човечки вредности и желби. Овој процес мора да биде транспарентен и под општествена контрола за технологијата навистина да служи на општото добро.

Дали Алтман е премногу оптимистичен?

Иако Алтман е оптимист, експерти од други технолошки гиганти – како "Apple" – предупредуваат дека сè уште сме далеку од вистинска "AGI". Последните истражувања покажуваат дека актуелните "AI" модели не успеваат да совладаат сложени задачи надвор од ограничени рамки и често покажуваат ограничени способности за планирање.

Сепак, Алтман останува уверен дека напредокот е неизбежен и дека во следните неколку години технологијата ќе направи скок што ќе изненади многумина. Само времето ќе покаже кој бил во право, а светот со нетрпение го следи секој нов чекор од оваа технолошка трка.