На гала вечерата „Kering Women in Motion Presidental Dinner“ на овогодишниот Кански филмски фестивал, актерската елита покажа како комбинацијата од гламур и храброст може да ја направи секоја модна комбинација незаборавна.
Меѓу гостите се истакнаа двајца членови на ѕвездениот ансамбл од серијата „Белиот лотос“, Патрик Шварценегер и Шарлот Ле Бон, како и бројни други дами чии модни избори предизвикаа воодушевување.
Младиот Шварценегер, кој наскоро ќе застане пред олтарот со манекенката Еби Чемпион – блесна во совршено скроен црн костум со дискретни метални детали на реверите, заедно со класична бела кошула и црна вратоврска. Неговиот изглед беше олицетворение на вечерна елеганција, а кројот по мерка дополнително ја нагласи неговата атлетска фигура.
Од друга страна, Шарлот Ле Бон (38), се појави во несекојдневна комбинација: оверсајз машка јакна, широки панталони и бели патики „Пума“.
Ова „моќно одело“ во лежерна верзија покажува дека границите помеѓу вечерната и дневната гардероба се бришат и дека модерната жена владее со модата исто како што Патрик владее со срцата на своите обожаватели.
Роузи Хантингтон-Витли (38) ги привлече сите погледи во црниот фустан без прерамки што совршено прилегаше на нејзината фигура, додека нејзините препознатливи очила за сонце во форма на „мачкини очи“ додадоа нота на стариот холивудски гламур.
Сепак, она што целосно го „украде шоуто“ беше свечената вечера по црвениот килим, каде што младиот Шварценегер и манекенката, инаку сопруга на Џејсон Стејтам, седеа еден до друг.
Многумина коментираа дека, иако двајцата се зафатени, би биле навистина убав пар, особено по видеото што еден од присутните го сними и објави, а кое брзо стана вирално.
Во споменатото видео, Роузи и Патрик изгледаат посветени на разговорот, а обожавателите коментираа дека двајцата „заводливо се насмевнувале и не го тргале погледот еден од друг“.
„Таа отворено флертува со него“, „Нели двајцата се зафатени“ и „Џејсон Стејтам плаче додека го гледа ова“ беа само дел од коментарите на обожавателите.
