На некои од најголемите европски пазари за електрични возила, купувачите масовно ја напуштаат "Tesla" – делумно поради незадоволство од однесувањето на извршниот директор Илон Маск, а делумно поради тоа што наоѓаат подобри алтернативи кај други производители.

Драматичен пад во Шведска

Причините се различни, но бројките се недвосмислени. Во април, продажбата на "Tesla" во Шведска се намали за неверојатни 81%, достигнувајќи најниско ниво од октомври 2022. Во Холандија е забележан пад од 73,8% во споредба со истиот месец минатата година. Во Данска и Франција, бројките паднаа за 67%, односно 59%. Дури и во Португалија, каде падот не беше толку остар, продажбата се намали за 33%.

Сето ова се случува и покрај обидите на "Tesla" да ја заживее својата позиција во Европа со лансирањето на обновениот "Model Y". Овој електричен кросовер со години беше носител на продажбата на компанијата и редовно се наоѓаше на врвот на европските листи. Но, дури ни редизајнот и техничките подобрувања не успеаја да го вратат интересот на европските купувачи.

Продажбата на "EV"-возила расте, но продажбата на "Tesla" продолжува да паѓа

Во првиот квартал од годинава, продажбата на електрични возила во Европската унија порасна за 23,9%. Сепак, продажбата на "Tesla" во истиот период се намали за 45%, на само 36.167 возила, покажуваат податоците на Асоцијацијата на европски производители на автомобили (ACEA). Со тоа, пазарниот удел на "Tesla" во ЕУ падна од 2,4% на 1,3%.

На проширениот пазар – ЕУ, Обединетото Кралство и земјите од ЕФТА (Исланд, Лихтенштајн, Норвешка и Швајцарија) – продажбата на "Tesla" во првиот квартал се намали за 37,3%, додека вкупната продажба на електрични возила порасна за 28%.

Ниту во Америка состојбата не е сјајна

Ситуацијата не е многу подобра ниту во САД. Според податоците на "Cox Automotive", вкупната продажба на електрични возила во Америка пораснала за 11,4% во првиот квартал, но продажбата на "Tesla" опаднала за 8,6%.

Падот во Европа доаѓа по исклучително слаба година за "Tesla", која лани го забележа најниското ниво на испораки на возила во повеќе од две години – глобален пад од 13%.

Големото прашање: Може ли "Tesla" да се извлече?

Големото прашање сега е дали "Tesla" ќе успее да се извлече од овој пад. Судејќи според интересот за најавениот пристапен електричен пикап наречен "Slate", многумина сметаат дека на компанијата ѝ е итно потребен долгонајавуваниот евтин модел. Се шпекулира дека "Tesla" планира да претстави нов, подостапен "EV" уште следниот месец. Но сè уште не е јасно што точно ќе биде лансирано – некои извори тврдат дека ќе биде поедноставен, помал "Model Y", додека Илон Маск, изгледа, има визија за "robotaxi" без волан и со експериментален софтвер.