По трагичниот настан во кој животот го загубија над 60 млади луѓе, Кочани остана во тишина. Болка, шок, неверување и чувство на беспомошност сè уште тивко живеат во многу млади, семејства и професионалци. Зад оваа тишина се кријат луѓе кои не знаат како да се справат со она што го чувствуваат – и тоа е разбирливо.
Но токму затоа е важно да не останеме сами. Да создадеме простор каде што ќе може да се зборува, да се чуе, да се издржи заедно и полека – да се заздравува.
Овој мај започнува програмата „Простор за поддршка“ – серија бесплатни групни работилници за:
• Млади (14–25 години) – кои не се чувствуваат подготвени да зборуваат индивидуално, но ќе се придружат на група со која можат да се слушнат, препознаат и поддржат.
• Семејства на настраданите, но и сите оние кои се чувствуваат погодени – за поддршка во процесот на жалење, справување со тагата и грижата за своите најблиски.
• Професионалци – пожарникари, наставници, полицајци, здравствени работници – оние кои беа таму, и оние кои секојдневно ја носат тежината на другите.
Работилниците ќе се одржуваат во Кочани, секој викенд почнувајќи од 10 мај, во циклуси од:
• 8 сесии за млади и семејства (секоја сабота)
• 4 сесии за професионалци (секоја втора сабота)
Сесиите се водени од искусни психолози и психотерапевти и вклучуваат техники за стабилизација, споделување и градење психолошка отпорност. Учеството е целосно бесплатно и доверливо.
Пријави се:
Доколку сакате да учествувате, да вклучите некој близок или само да дознаете повеќе, контактирајте нѐ на:
📞 078 313 306
Да не дозволиме тишината да остане гласот на болката.
Да си помогнеме – сега, кога е најпотребно.
Реализацијата на проектот е овозможена од dm Македонија во соработка со стручниот тим на Психолошкиот Центар Алтернатива – Групација Алтернатива.
