Карло Анчелоти е на заслужен одмор за време на Божиќните и предновогодишните празници, но фактот што се вратил во родната Италија на неколку дена им овозможило на новинарите на „Раи Радио 1“ да го исконтактираат трофејниот фудбалски стручњак.
Дон Карло секогаш е достапен за медиумите од својата татковина и се обидува да биде максимално коректен кога зборува за сите екипи од Серија А, но сега признава дека во последно време се почесто го следи Комо на Сеск Фабрегас.
Причина за тоа е талентираниот Нико Паз кој направи трансфер од Реал Мадрид во Комо изминатово лето, но бидејќи станува збор за операција во која е вклучена клаузула за ре-откуп, „кралевите“ будно го следат прогресот на фантастичниот Аргентинец.
– Одблизу следиме што се случува со Паз и каков прогрес бележи во Комо. Тој е фантастичен талент и знаеме каков потенцијал поседува.
– Мислам дека ќе има голем бенефит од оваа сезона која ќе ја игра надвор од Реал Мадрид. Ние не сме се откажале од него, веруваме дека може да биде иднината на Реал , – потенцира Анчелоти за фудбалерот кој Реал има ексклузивно право да го откупи во 2025-та и 2026-та година.
