Поранешниот извршен директор на Google, Ерик Шмит, изрази загриженост за иднината на младите мажи, предупредувајќи дека „денешната младина е опседната со девојки со вештачка интелигенција“.
За време на неодамнешно интервју во подкастот „The Prof G Show“, Шмит истакна дека ниту родителите ниту младите се доволно подготвени за справување со она што тој го нарече „неочекуван проблем со постоечката технологија“.
Овие виртуелни придружници, според Шмит, се „толку совршени што на крајот ги фасцинираат младите луѓе и ги оддалечуваат од реалниот свет“.
„Можна е таква опсесија, особено кај младите кои сè уште не се целосно емотивно или психолошки формирани,“ предупреди тој.
Иако и жените користат романтични партнери со вештачка интелигенција, Шмит нагласи дека младите мажи се особено ранливи затоа што „често се свртуваат кон онлајн светот за задоволства“. Дополнително, алгоритмите што промовираат проблематична содржина ја зголемуваат нивната изложеност на ризици.
„Кога ќе му дадете на 12- или 13-годишно дете пристап до сето добро, но и сето зло на светот, тие не се подготвени да се справат со тоа,“ рече Шмит.
Опасностите од ваквата технологија веќе се покажаа, како во случајот на 14-годишно момче од Флорида кое било наведено да изврши самоубиство преку чет-бот. Иако ова е крајност, Шмит предупреди дека ваквите случаи ја нагласуваат итната потреба од регулација.
„Веројатно ќе биде потребна уште поголема трагедија за да се предизвика регулаторна промена,“ рече Шмит. „Но, тешко е да се замисли нешто пострашно од смртта на тинејџер поради влијанието на неговата виртуелна „девојка“ со вештачка интелигенција.“
