Моника Селеш, која вчера го прослави својот 51 роденден, сè уште живее во Сарасота, Флорида, а благодарение на Инстаграм можеме да видиме детали од нејзиниот секојдневен живот. Таа во слободното време сака да готви, да чита и да поминува време во природа.
Моника се активираше и на полето каде најдобро се снаоѓа, но сепак не се врати на теренот туку остана во негова близина, па така ја забележавме во публиката на Вимблдон минатото лето, кога го следеше финалниот меч на Новак Ѓоковиќ. Инаку Селеш е активна во жирито на Лауреус наградите, а одвреме-навреме се појавува на јавни настани кои не секогаш се поврзани со тенисот.
Претходните години јавноста со право се прашуваше каде е „Малата Мо“, што правела, со што се занимавала. Меѓутоа, оние кои ја следат на Инстаграм знаат на што е посветена поранешната тенисерка, а тоа е пред сè, здравиот живот, што може да го потврди и нејзината линија, која ја доведе до совршенство благодарение на посебната исхрана, редовното вежбање и престојот во природа, за што сончевата Флорида, каде што живее со децении, нуди одлични услови.
Таа често ги поканува своите следбеници да ѝ се придружат во спортските предизвици како брза прошетка низ шума или возење велосипед – еден вид натпревар во стилот „кој може најдолго да издржи“.
Инаку помеѓу омилените нешта на Моника во последните години е готвењето. Исто така води строга сметка за исхраната, а како што изјави во едно интервју, сега нејзиниот приоритет се семејството, пријателите и добрата забава.
