Извештајот на "WMO" ги документира, меѓу другото, нивото на водата во езерата и реките, влажноста на почвата и висината на глечерите и снегот.
Во реките ширум светот во 2023 година имало помалку вода отколку кога било во последните 30 години, се вели во извештајот на Метеоролошката агенција на Обединетите нации. Во документот објавен во неделата од Светската метеоролошка организација (WMO), се наведува дека глобалните водостои во последните пет години биле значително под долгорочниот просек.
Падот на нивото на водата е предизвикан од климатските промени, а дополнително се влошил со временскиот феномен Ел Нињо, кој природно се случува на неколку години и влијае на врнежите ширум светот. Минатата година беше најтопла досега, а глечерите изгубија повеќе мраз отколку во последните 50 години, наведено е во извештајот на "WMO".
Но, не сите реки се подеднакво погодени. Според "WMO", нивото на водата било под долгорочниот просек во сливот Мисисипи во САД, во басенот на Амазон во Јужна Америка и во сливовите на реките Ганг, Брахмапутра и Меконг во Азија, како и други реки во Источна Африка, северниот дел на Нов Зеланд, на Филипините и во Северна Европа.
„Водата е како канаринци во рудник за јаглен за климатските промени“, рече генералниот секретар на "WMO", Селесте Сауло, мислејќи на старата традиција луѓето да земаат канаринци со себе во рудникот бидејќи птиците ја губат свеста пред луѓето. Ова им служело како рано предупредување за потенцијално фатално ниво на јаглерод моноксид во рудникот.
„Постојано добиваме сигнали за опасност во форма на се поекстремни врнежи од дожд, поплави и суши кои предизвикуваат големи жртви во животи, екосистеми и економии … а сепак не ги преземаме потребните мерки“, рече таа. Според податоците на ОН, дури 3,6 милијарди луѓе, што е повеќе од 40 отсто од светското население, немаат доволно вода барем еден месец во годината. Пресметките на моделот покажуваат дека оваа бројка веројатно ќе се зголеми на 5 милијарди до 2050 година.
Извештајот на "WMO" ги документира, меѓу другото, нивото на водата во езерата и реките, влажноста на почвата и висината на глечерите и снегот. Но, голем број земји не успеаја да придонесат со податоци во студијата, бидејќи им недостасува еден параметар кој вклучува податоци за само 30 земји. Во такви случаи, "WMO" користи моделски пресметки за да ги пополни празнините, но бара итно да се соберат повеќе податоци.
