Студиото „Warner Bros“ го објави првиот официјален трејлер за високоочекуваниот научно-фантастичен филм „Mickey 17“. Трејлерот брзо стана вирален, собирајќи повеќе од два милиони прегледи на Јутјуб за само неколку часа.
„Mickey 17“ требаше да биде премиерно прикажан во март, но беше одложен за следната година бидејќи постпродукцијата не е завршена.
Тоа е најновиот филм на признатиот корејски режисер Бонг Џун-хо, познат на повеќето западни фанови по трилерот „Parasite“ кој е награден со Оскар. „Mickey 17“ е адаптација на романот „Mickey7“ од Едвард Ештон.
Главната улога во претстојниот филм ја игра Роберт Патинсон, кој го игра Мики, вработен во компанија која се обидува да ја колонизира ледената планета Нифлхајм. Секој пат кога Мики умира, компанијата го клонира, а неговиот клон ги задржува повеќето негови спомени.
Заедно со Патинсон, во филмот играат и Стивен Јеун, Наоми Аки, Тони Колет и Марк Рафало.
Реакциите на трејлерот се позитивни
Филмските фанови кои едвај го чекаат новиот филм на Јун-Хо, се воодушевени од трејлерот и ги споделија своите мислења на различни социјални мрежи.
„Бонг Џун-хо е вистински визионер. Никогаш не мислев дека ова ќе биде толку смешно“, „Овој филм ми треба сега“, „Патинсон е веќе познат како еден од најдобрите актери на помладата генерација, а ова изгледа неверојатно“, „Едвај чекам“, се само дел од коментарите на мрежата Х.
Филмот е продуциран од „Offscreen“, „Plan B Entertainment“ и „Kate Street Picture Company“, а дистрибуиран од „Warner Bros“. Истиот ќе биде премиерно прикажан на 28-ми јануари следната година во Јужна Кореја, а во остатокот од светот ќе биде прикажан на 31-ви јануари.
