Патувањето во „соло аранжман“ не е нова појава, но во последните години доживеа вистински бум. Сè повеќе авантуристи се одлучуваат да патуваат без придружба, избирајќи ја слободата за планирање и можноста да го истражуваат светот со свое темпо.
Без разлика дали сакате сами да го организирате секој детал од патувањето или сонувате за авантура инспирирана од популарниот филм и книга „Eat, Pray, Love“, соло патувањето дава единствена можност за личен раст, но и за доживување на самата дестинација во малку поинаков начин. Но, кој е најдобриот град за вакви патувања?
Платформата за резервации за одмор „Kayak“ штотуку објави листа на најдобрите дестинации во светот за соло патници, земајќи предвид неколку клучни фактори како што се трошоците за сместување и храна, безбедноста и бројот на културни атракции.
Според нивните анализи, Берлин бил на врвот на листата. Германската престолнина го освои првото место благодарение на исклучителната комбинација на пристапни цени и богатата културна понуда.
Со просечна цена на хотелско сместување од 152 евра и трошоци за оброци од околу 28 евра, Берлин е релативно прифатлива дестинација, пишува „Putni kofer“. Она што го прави посебен за соло патниците е импресивниот број на музеи, театри и концертни сали – дури 12,43 на 100.000 жители, што го рангира на третото место во овој поглед, веднаш зад Париз и Милано.
Според авторите на истражувањето, Берлин е една од најдобрите опции за соло патниците кои сакаат богата културна сцена додека се чувствуваат безбедно и добредојдено.
Жив, шарен, гласen, убав
Сите овие зборови совршено го опишуваат главниот град на Германија, а сепак ниту еден од нив не е доволен за да претставува сè што е и има да понуди, пишува овој портал. Берлин е град на уметници, град на мултикултурализмот, град на музиката, град на најлудите забави, но и град на бурното и болно минато …
Звучи неверојатно дека пред неполни 80 години практично бил срамнет со земја и дека до пред нешто повеќе од триесет години бил поделен на половина со ѕид, но сите тие рани од минатото ги вградил во сегашноста, оставајќи мали потсетници на неговите улици за времињата кои никогаш не смеат да се повторат.
