Иранската Револуционерна гарда заплени „странски брод“ и соопшти дека запленетиот брод криумчарел милиони барели гориво, објавија иранските државни медиуми.
Техеран неодамна дојде до конфликт и со Лондон, откако Велика Британија заплени ирански нафтен танкер поради сомнение дека ги прекршувал санкциите така што превезувал нафта во Сирија, а од иранскиот државен врв се заканија дека ќе возвратат на тоа.
Деновиве танкерот во Персискиот залив бил пресретнат од Исламскиот револуционерен стражарски корпус во близина на островот Ларак во Хормушкиот теснец во близина на иранскиот брег кој важи за „тесно грло“ во поморскиот сообраќај во водите на Персискиот залив.
IRGC forces seize a foreign vessel carrying smuggled fuel in #PersianGulf. #Iran #tanker #IRGC pic.twitter.com/S8HhFhiB6z
— Press TV 🔻 (@PressTV) July 18, 2019
Според соопштението кое го пренесе иранската државна телевизија, бродот бил запленет на 14-ти јули, а од иранската Револуционерна гарда засега не откриваат во чија сопственост е запленетиот танкер.
Да потсетиме, откако се зголемија тензиите на релација Вашингтон – Техеран, исто така беа драстично нарушени односите на Техеран и со Лондон, откако неодамна во близина на Гибралтар британските власти запленија ирански танкер со нафта.
Откако Техеран се закани дека тоа нема да помине неказнето, британските власти вчера наредија испраќање на воен брод на британската кралска морнарица во водите на Персискиот залив, кој заедно со уште два воени британски бродови распоредени во регионот ќе ги чуваат британските комерцијални бродови кои минуваат низ заливот.
