Киселата зелка е многу повеќе од зимска салата: Шест здравствени придобивки, но и предупредување кој треба да ја избегнува

Точка

16/11/2026

19:31

417

Големина на фонт

а а а

Оваа ферментирана намирница е богата со пробиотици и растителни влакна, а може да придонесе за здравјето на цревата, срцето и мозокот.

Киселата зелка не е само традиционална намирница, туку и добар извор на корисни бактерии, витамини и минерали. Содржи малку калории, а изобилува со растителни влакна, поради што може да биде корисен додаток во секојдневната исхрана.

Што содржи киселата зелка?

„Киселата зелка се добива со ферментација на зелка и сол. Овој процес овозможува развој на корисни бактерии, односно пробиотици, кои придонесуваат за здравјето на цревата“, изјавил регистрираниот диететичар Алексис Супан за Клиниката во Кливленд.


Една шолја (142 грама) кисела зелка содржи приближно:

27 калории

4,12 грама растителни влакна

1,29 грама протеини

6,08 грама јаглехидрати

Киселата зелка е богата и со витамини Б6, Ц и К1, како и со железо, калиум, манган, бакар и фолати.

Шест здравствени придобивки од киселата зелка

Ја подобрува дигестијата

Пробиотиците од киселата зелка придонесуваат за рамнотежата на цревната микробиота. Истражувањата укажуваат дека ферментираната храна може да го поддржи здравјето на цревната слузница и да го намали воспалението.


Го зајакнува имунитетот

Корисните бактерии можат да го спречат растот на штетните микроорганизми и да ги поддржат одбранбените функции на организмот. Витаминот Ц и железото дополнително придонесуваат за нормалното функционирање на имунолошкиот систем.

Една шолја сечкана зелка ги задоволува дневните потреби за витамин Ц, кој е важен антиоксиданс што придонесува за забавување на стареењето на организмот, го поддржува здравјето на црниот дроб и го зајакнува имунолошкиот систем.

Помага во контролата на телесната тежина

Со само околу 27 калории по шолја и висока содржина на растителни влакна, киселата зелка може да придонесе за подолготрајно чувство на ситост и полесна контрола на апетитот.


Придонесува за здравјето на срцето

Растителните влакна можат да помогнат во регулирањето на холестеролот, додека витаминот К2, кој е присутен во одредени ферментирани производи, учествува во метаболизмот на калциумот.

Го зачувува здравјето на коските

Витаминот К2 ги активира протеините кои учествуваат во врзувањето на калциумот и неговото искористување во коските.

Го поддржува здравјето на мозокот

Постои поврзаност меѓу цревната микробиота и функциите на мозокот. Пробиотиците се предмет на истражувања поради нивното можно влијание врз стресот, расположението и меморијата, но потребни се дополнителни истражувања.

Која кисела зелка е најдобра?

Најдобар избор е непастеризираната кисела зелка, бидејќи при процесот на пастеризација, со загревање, се уништуваат живите пробиотски култури.

Затоа се препорачува да се купуваат производи што се чуваат во фрижидер. Обрнете внимание и на декларацијата – идеално е составот да содржи само зелка и сол, без непотребни додадени шеќери и конзерванси.


Кој треба да биде внимателен?

Киселата зелка е безбедна за повеќето луѓе, но лицата кои земаат инхибитори на моноаминооксидаза (МАО-инхибитори), лекови што се користат во третманот на депресија, анксиозност и Паркинсонова болест, треба да се консултираат со лекар поради можни интеракции.

Важно е да се обрне внимание и на натриумот. Една шолја кисела зелка може да содржи приближно 1.000 милиграми натриум, што претставува значителна количина, особено за лицата кои мора да го ограничат внесот на сол.

Не е неопходно киселата зелка да се јаде секојдневно. Дури и неколку залчиња еднаш или двапати неделно можат да придонесат за внесување корисни бактерии.