Во касарната „Илинден“ во Скопје се одржа воена свеченост. Единицата ги продолжува традициите на бригадата формирана на 11 ноември 1943 година во Сливово.
Баталјонот за почести денеска, со воена свеченост во касарната „Илинден“ во Скопје, го одбележа 11 Ноември – Денот на единицата, соопшти Армијата.
Пред присутните се обратија началникот на Генералштабот, генерал-мајор Сашко Лафчиски, и командантот на баталјонот, потполковник Игор Милчов. Присуствуваа и министерот за одбрана Владо Мисајловски, армиски команданти и поранешни припадници.
Протоколот како одговорна мисија
Лафчиски ја нагласи улогата на единицата во претставувањето на Армијата и државата. Тој го истакна и придонесот на Воениот оркестар во протоколарните и меѓународните ангажмани и предновогодишниот концерт.
Истакнати припадници добија стимулативни мерки. Наредник Горанчо Атанасовски, кој заминува во пензија, доби плакета за долгогодишната служба.
Традиција поврзана со Сливово
Баталјонот ги носи традициите на Првата македонско-косовска народноослободителна ударна бригада, формирана на 11 ноември 1943 година во селото Сливово.
Во пресрет на празникот биле организирани хуманитарна акција со Црвениот крст и доброволно дарување крв.
