Името „Nokia“ би можело да исчезне од мобилните телефони што ги произведува „HMD Global“ веќе во 2029 година. Според новите неофицијални информации, финската компанија не планира да го обнови договорот за користење на прочуениот бренд кога ќе истече актуелната лиценца.
Информацијата ја објави инсајдерот познат како „smashx_60“, кој тврди дека партнерството меѓу компаниите „HMD“ и „Nokia“ ќе заврши во 2029 година. Тоа би значело дека „HMD“ повеќе нема да може да го користи името „Nokia“ на своите нови телефони без склучување нов договор.
Соработката меѓу двете компании започна во 2016 година, кога „HMD“ доби право да произведува и продава телефони под брендот „Nokia“. Благодарение на тој договор, на пазарот се вратија телефоните „Nokia“ со „Android“, но и модернизирани верзии на прочуените модели со физичка тастатура.
Првичниот договор требаше да истече во 2026 година, но во октомври 2025 година беше продолжен до март 2029 година за класичните телефони „Nokia“ на одредени пазари. Новите извештаи сугерираат дека нема да има дополнително продолжување, иако ниту една од компаниите сè уште официјално не потврдила таква одлука.
„HMD“ веќе се подготвува за иднина во која нема да зависи од името „Nokia“. Компанијата во последните години сè повеќе го промовира сопствениот бренд, а според информациите од истиот извор, од 2027 година планира и проширување на понудата со паметни часовници, безжични слушалки, преносни рутери за „Wi-Fi“, надворешни батерии и други додатоци.
Таквата стратегија би му овозможила на „HMD“ да се развива како производител на поширок спектар потрошувачка електроника, наместо работењето да го заснова претежно на мобилни телефони.
Сепак, тоа не значи дека „Nokia“ како компанија престанува да постои. „Nokia“ и натаму работи во областа на телекомуникациската инфраструктура и развојот на мрежните технологии. Исто така, евентуалниот крај на соработката со „HMD“ не ја исклучува можноста телефоните „Nokia“ во иднина да се појават преку некој нов договор за лиценцирање.
Засега е потврдено само дека постојната лиценца за одредени класични телефони важи до 2029 година. Дали тоа навистина ќе биде последната година за телефоните „Nokia“ под закрила на „HMD“, останува да се види.
