Општина Карпош инвестира во образованието со обезбедување нови лектирни изданија за сите општински основни училишта, со цел да се поттикне читачката култура и да се збогатат училишните библиотеки.
Општина Карпош продолжува да инвестира во образованието и да создава подобри услови за учење, знаење и развој на најмладите. Со цел збогатување на училишните библиотеки и поттикнување на читачката култура, обезбедени се нови лектирни изданија за сите општински основни училишта на територијата на Карпош, известуваат од Општината.
„На овој начин, на учениците им се овозможува полесен пристап до задолжителната и дополнителната литература, а воедно се поттикнуваат љубовта кон книгата, читачките навики и интересот за пишаниот збор.
Книгите се многу повеќе од извор на знаење – тие ја развиваат фантазијата, го збогатуваат речникот, ги прошируваат хоризонтите и отвораат нови светови пред младите читатели. Инвестирањето во книгите е инвестирање во знаењето, културата и иднината на нашите деца“, соопшти Општина Карпош.
