Се покажа дека дојавите биле лажни, што секако не значи следните нема да бидат вистински.

Не е изненадувачки што истовремените и координирани лажни дојави за бомби против авиокомпании, заедно со други злонамерни активности ширум Европа, наведуваат одредени поединци да се посомневаат во Русија.

По серијата сајбер-напади и мистериозните појави на дронови над чувствителни објекти на почетокот на оваа година, во последните денови се забележани и хакерски напади врз замрзнувачи во супермаркети, како и врз една банка за крв.

*Фото: Би-би-си

Покрај тоа, се случил и сомнителен инцидент на границата меѓу Полска и Русија, а во август еден дрон го нападнал аеродромот Лајпциг-Хале во Германија, за што тамошниот министер за внатрешни работи јавно ја обвини Москва.

Дали зад сето ова стои Русија?

Многумина сметаат дека, врз основа на посредните докази, ова мора да биде уште еден пример за таканаречена „хибридна војна“, „војна во сивата зона“ или „конфликт под прагот на отворена војна“.

Станува збор за активности со кои се нанесува штета на инфраструктурата или општеството на одредена држава, но кои главно се анонимни, можат да бидат негирани и не го достигнуваат нивото што би го активирало членот 5 на НАТО и би предизвикало одговор од Западот.

Москва несомнено е бесна на НАТО поради поддршката за Украина, со која се осуетуваат плановите на Кремљ да ја „проголта таа земја и практично да ѝ стави крај на нејзината независност“, пишува Би-Би-Си.

Руските блогери, исто така, сугерираа дека, ако украинските дронови во моментов ги прават руските аеродроми небезбедни, а западните санкции ги спречуваат руските авиокомпании да го користат европскиот воздушен простор, зошто и западните земји не би требало да почувствуваат таква штета?

Меѓутоа, до четвртокот навечер не се појави ниту еден цврст доказ што би ги поврзал лажните дојави за бомби против авиокомпаниите со Русија, Иран или која било посредничка група. 

„Машка легија“

Во четвртокот наутро, до управите на аеродромите во Рим пристигнала е-порака со закана, наводно испратена во име на групата „Борци на машката држава“.

Овој назив веројатно се однесува на руската група „Машка легија“, ултрадесничарска организација со толку екстремни ставови што московскиот суд ја забранил во 2021 година.

Сепак, групата задржала десетици илјади следбеници на Телеграм, каде што следната година го поддржала почетокот на руската целосна инвазија врз Украина.

*Активисти на „Машка легија“ на протестен собир во Москва во 2017 година

Меѓутоа, дури иако е-пораката навистина била испратена во име на таа група — а кој може да гарантира дека некоја друга организација не се крие зад нејзиното име — малку е веројатно дека таа ќе понуди индиции што им се потребни на полицијата и на управите на аеродромите за да утврдат кој стои зад овие лажни дојави и зошто ги испраќа.

За националните полициски служби, управите на аеродромите и министерствата за транспорт, кои се обидуваат да утврдат кој стои зад овие закани и како да ги ублажат нивните последици кога повторно ќе се случат, најважно е да не тргнуваат од тоа кој им изгледа како најверојатен виновник, туку да ги следат конкретните и проверливи траги — доколку успеат да ги пронајдат.