Новата документарна серија за Џастин Тимберлејк треба да донесе осврт на некои од најпознатите моменти од неговиот приватен и професионален живот. Меѓу темите, според достапните информации, ќе се најдат и контроверзниот настап со Џенет Џексон на Супербоул во 2004 година, но и неговата врска со Бритни Спирс.
Тимберлејк конечно ќе ја раскаже својата животна приказна пред камерите. Американскиот пејач ќе биде во центарот на новата документарна серија, која ќе биде прикажана на „Епл ТВ“ во декември. Според пишувањата на американските медиуми, во неа ќе се осврне и на некои од почувствителните моменти во својата кариера.
Документарецот, меѓу другото, ќе се занимава и со настанот што го одбележал настапот на Тимберлејк и Џенет Џексон за време на полувремето на Супербоул во 2004 година. Според медиумските наводи, Џексон исто така ќе учествува во документарецот и ќе зборува за бурните реакции на јавноста и медиумите што следувале по нивниот заеднички настап, кога Тимберлејк повлекол дел од нејзиниот костим, при што накратко ѝ била откриена едната дојка, пишува „Варајети“.
Друга важна тема на документарецот ќе биде врската на Тимберлејк со Бритни Спирс. Според „Варајети“ пејачот би требало да се осврне и на нејзините претходни изјави за нивната врска. Потсетуваме, Бритни во својата автобиографија „The Woman in Me“, објавена во 2023 година, изнела детали за нивниот однос и открила дека за време на врската со Тимберлејк останала бремена, но и дека ја прекинала бременоста. Нејзините сведоштва повторно ги отворија прашањата за нивната врска и за начинот на кој таа била претставувана пред јавноста.
Тимберлејк и Спирс биле во врска од 1999 до 2002 година, а нивното раскинување во тоа време предизвика голем интерес кај медиумите и обожавателите. Нивната љубовна приказна со години остана една од најпознатите во поп-музиката од почетокот на 2000-тите.
Инаку, пејачот во последниве години се држи подалеку од очите на јавноста. Минатата година јавно открил дека му била дијагностицирана Лајмска болест, а имал и проблеми со законот откако бил уапсен поради возење во алкохолизирана состојба.
