Харизматичната британска актерка Сиена Милер и нејзиниот 14 години помлад свршеник, актерот и манекен Оли Грин, ги привлекле апсолутно сите погледи на првата досега одржана гала-вечер на „Ербиенби.орг“ (Airbnb.org) во Лос Анџелес.
Покрај хуманитарниот карактер на вечерта, овој ѕвезден пар донел вистинска љубовна магија на црвениот килим и одржал модна лекција што не се заборава.
За оваа свечена пригода, 44-годишната ѕвезда на филмовите „Алфи“ и „Американски снајперист“ се одлучила за едноставен, но неверојатно впечатлив гламур. Таа прошетала по црвениот килим и позирала во долг сатенски фустан во боја на слонова коска, од најновата колекција „Алберта Ферети Ресорт 2027“, а креацијата ги воодушевила модните критичари со својата необична и асиметрична конструкција, инспирирана од грчките божици.
Ткаенината била нежно обликувана во префинети набори, оставајќи го едното рамо целосно откриено, додека од другото рамо ракавот лежерно се спуштал по раката, создавајќи драматичен и романтичен ефект.
Внимателно поставениот јазол на колкот совршено ја истакнувал витката фигура на убавата актерка, додека брановите од свиленкастиот сатен елегантно се спуштале до подот.
Нејзината насмевка ги маѓепсала присутните, а Сиена го заокружила целиот изглед со минималистички стил – својата препознатлива руса коса ѝ била пуштена во нежни бранови, со природна шминка, додека доза луксузен сјај додала со раскошен дијамантски накит од брендот „Тифани и Ко.“ (Tiffany & Co.), од нивната позната колекција „Bird on a Rock“.
И нејзиниот свршеник го следел елегантниот стил во класичен црн костум со снежнобела кошула, па многумина сметаат дека тие биле еден од најдобро облечените парови на вечерта.
Во врска се од 2022 година, а претходно оваа година ја објавија својата свршувачка. Заедно имаат едно дете, додека Сиена од претходната врска ја има 13-годишната ќерка Марлоу, со која неодамна се појавила во јавноста.
