Американскиот технолошки портал „BGR“ пишува дека производителите сместуваат неколку различни компоненти во близина на камерата, па зад слични отвори на различни лаптопи може да се крие различна опрема. Тоа го потврдуваат и упатствата на производителите, во кои се наведуваат микрофони, инфрацрвени камери, емитери и сензори за амбиентална светлина. 

Една од тие компоненти е „LED“ индикаторот, мала светилка што свети кога камерата е вклучена и така го известува корисникот дека е активна. Некои уреди имаат и капаче со кое камерата може да се покрие заради заштита на приватноста. 

Често тука се наоѓаат и микрофони. Според „BGR“, производителите ги поставуваат покрај камерата, во горната рамка на екранот, бидејќи таму се подалеку од куќиштето и вентилаторите што создаваат бучава при ладењето на компјутерот.

Втората камера служи за најавување со лице

Ако отворот покрај главната камера изгледа како уште една мала камера, можно е навистина да е тоа. Станува збор за инфрацрвена камера што ја користи „Windows Hello“, системот на „Microsoft“ за најавување на компјутерот со помош на биометриски податоци. 

„Windows Hello“ беше претставен во 2015 година. За препознавање лице користи специјално приспособена камера за снимање со блиска инфрацрвена светлина. Оваа технологија овозможува препознавање и при слабо осветлување, бидејќи инфрацрвената камера не зависи од вообичаената видлива светлина. 

Меѓутоа, во април 2025 година беше воведена важна промена. „Microsoft“ во белешките за ажурирањето на „Windows 11“ наведе дека, заради поголема безбедност, при најавувањето е потребно и камерата во боја да има видлив приказ на лицето на корисникот. 

Промената е поврзана со отстранување безбедносен пропуст што овозможувал заобиколување на заштитата при препознавање лице. 

Затоа најавувањето во целосно темна просторија може да не успее ако камерата во боја не го гледа лицето доволно јасно. Сепак, не е точно дека секој таков лаптоп безусловно престанува да се отклучува во темница – важни се осветлувањето на лицето, конкретниот уред и безбедносните поставки. 

„Apple“ сè уште нема воведено „Face ID“ на компјутерите „MacBook“, додека одредени модели „iPhone“ и „iPad Pro“ веќе со години ја користат оваа технологија за препознавање лице. Лаптопите „MacBook Air“ користат „Touch ID“ за препознавање отпечаток од прст.