Поранешниот англиски фудбалер Џермејн Пенант доживеал сериозна несреќа за време на прошетка, кога го нападнал германски овчар и му нанел тешки повреди на ногата.
Некогашниот играч на Ливерпул морал да побара лекарска помош, а раните што ги здобил биле толку сериозни што му биле ставени повеќе од 50 конци. Инцидентот се случил кога германскиот овчар го нападнал неговото куче, американска акита по име Кинг. Пенант веднаш реагирал и се обидел да го заштити својот миленик, но ситуацијата набргу се влошила и животното го нападнало и него.
Поранешниот фудбалер во разговор за британските медиуми открил колку драматично било сè. Како што објаснил, во еден момент се нашол на земја, додека кучето неколку секунди му ја држело ногата во челустите.
„Беше навистина застрашувачки. Другото куче го нападна Кинг, па јас се вмешав за да го заштитам. Во следниот момент, кучето ме нападна мене. Завршив на земја, а тоа ми ја држеше ногата во челустите најмалку пет секунди“, раскажал Пенант.
По нападот бил пренесен во болница, каде што лекарите му згрижиле четири рани од каснување на десната потколеница. Иако повредите биле санирани, една од нив особено го загрижила медицинскиот персонал, кој му укажал на можноста дека ќе биде потребна и хируршка интервенција. И покрај сè што се случило, Пенант порачал дека не планира да го пријави нападот во полиција.
Во текот на богатата фудбалска кариера, Пенант играл за бројни познати англиски клубови, меѓу кои Арсенал, Ливерпул, Бирмингем сити, Лидс јунајтед, Портсмут и Стоук сити. Во Премиер лигата забележал 231 настап, а професионалната кариера ја завршил во 2018 година, по 17 години поминати во фудбалот.
