Како што пренесува РТС, одредени батериски ќелии во електричните автомобили од семејството модели „ID“ на „Volkswagen“ не ги исполнуваат пропишаните стандарди поради грешки настанати при производството кај добавувачот. Во ретки случаи, овие неисправности можат да доведат до прекумерно загревање на батеријата, а во екстремни околности и до пожар.

Кои модели се опфатени со повлекувањето?

Според пишувањето на германскиот „Handelsblatt“, меѓу потенцијално погодените автомобили се моделите „ID. 3“, „ID. 4“, „ID. 7“ и „ID. Buzz“, како и „Cupra Born“, кој се произведува во рамките на групацијата „Volkswagen“.

Станува збор за одредени возила произведени меѓу 2023 и 2025 година, но тоа не значи дека сите автомобили од овие модели се опфатени со повлекувањето. Конечниот список на возила зависи од периодот на производство и од вградените батериски ќелии.

Како што наведува РТС, повлекувањето веќе е започнато во Велика Британија и Соединетите Американски Држави, додека во Германија и во другите европски земји се подготвуваат соодветни акции.

Според податоците на американските надлежни органи, во САД со повлекувањето се опфатени приближно 22.500 автомобили „ID. 4“.

На сопствениците им е препорачано да ги полнат батериите до 80 отсто

Како привремена безбедносна мерка, „Volkswagen“ го ограничува полнењето на погодените возила на најмногу 80 отсто од капацитетот на батеријата, за да го намали ризикот од прегревање.

Дел од автомобилите ќе бидат упатени во овластени сервиси за проверка на високонапонските батерии. Ограничувањето на полнењето ќе биде укинато дури откако ќе се утврди дека батеријата е исправна.

Компанијата писмено ќе ги извести сопствениците на возилата опфатени со повлекувањето за потребните проверки и за следните чекори, пренесува РТС.

Засега не е официјално потврден вкупниот број возила што ќе бидат повлечени на европскиот пазар.