Рускиот министер за надворешни работи Сергеј Лавров изјави дека украинскиот претседател Володимир Зеленски не заслужува прекин на непријателствата и оти Русија нема да наседне на неговите ветувања. Тој го изјави ова на прес-конференција по разговорите со либанскиот министер за надворешни работи и за прашања на иселениците, Јусеф Раџи.

„Не сметам дека тој заслужува прекин. Не верувам дека повторно ќе наседнеме на гаранции и ветувања. Претседателот Владимир Путин јасно го стави тоа до знаење. Ние продолжуваме да ги остваруваме целите на специјалната воена операција“, рече Лавров.

„Нашите цели им се добро познати на сите. Никогаш не сме ги менувале, за разлика од Зеленски и неговите европски господари, кои постојано го менуваат правецот и ги менуваат ставовите. Затоа, немаме потреба да се правдаме пред никого“, додаде тој.

Зеленски бара 60-дневно примирје за избори

Зеленски вчера изјави дека 60-дневно примирје би ѝ овозможило на неговата земја да одржи претседателски избори, по забелешката на американскиот претседател Доналд Трамп дека е „време Украина да добие нов претседател“.

Зеленски истакна дека одржувањето избори во овој момент е „целосно невозможно“ од безбедносни причини, бидејќи нападите се случуваат „дење и ноќе“. Тој повика на „целосен прекин на огнот“.

Според Лавров, реакцијата на Зеленски покажува само едно: „Тој сака да ги искористи сите зборови, сите иницијативи и сите идеи што се појавуваат во јавноста за да ги унапреди сопствените интереси и да обезбеди оддишка по секоја цена“.

„Постои само една цел, и таа е многу едноставна: да се добие време и да се обезбеди оддишка. Тој рече дека е дури и подготвен да одржи претседателски избори доколку му се дадат два месеца за прегрупирање. Во тој период, Европа би можела да го снабди со ново оружје за да ја продолжи терористичката војна против рускиот народ“, заклучи Лавров.