Бразилскиот сенатор Флавио Болсонаро ќе се соочи со актуелниот претседател Луис Инасио Лула да Силва во вториот круг од претседателските избори, откако во првиот круг освои околу 47 отсто од важечките гласови, пренесе Ројтерс.

Откако беа обработени речиси 100 отсто од гласачките ливчиња, Болсонаро освои 47,05 отсто од гласовите, а Лула 45,14 отсто, со што убедливо ги надминаа резултатите на останатите десет кандидати, покажаа прелиминарните податоци објавени од Бразилската изборна комисија.

Вториот круг е на 25 октомври.

Со оглед на тоа што ниту еден кандидат не освои повеќе од 50 отсто од гласовите, во вториот круг, закажан за 25 октомври, Бразилците ќе одлучат дали 80-годишниот Лула ќе освои четврти мандат или ќе биде заменет од 45-годишниот Болсонаро.

Десничарскиот сенатор е син на поранешниот бразилски претседател Жаир Болсонаро, кој беше осуден на 27 години затвор за планирање државен удар по поразот на изборите во 2022 година.

Приватните анкети спроведени пред изборите предвидуваа дека Лула ќе води со околу три процентни поени во првиот круг. И покрај растечката загриженост за јавните финансии и бавниот економски раст на Бразил, во кампањата немаше вистинско политичко соочување, бидејќи двајцата водечки кандидати ги избегнаа големите телевизиски дебати.

Трамп го пречека Флавио Болсонаро во Белата куќа.

Доколку победи Болсонаро, тоа ќе претставува уште една победа за десничарските кандидати низ Латинска Америка кои се блиски до американскиот претседател Доналд Трамп, додека пак, реизборот на Лула би бил кошмар за Вашингтон, кој имаше несогласувања со неговата администрација околу прашања поврзани со трговијата и безбедноста.

Трамп официјално не поддржа ниту еден кандидат, иако го пречека сенаторот Флавио Болсонаро во Белата куќа и јавно го пофали. Ројтерс во средата објави дека бразилските разузнавачки служби ги информирале француските и германските делегации за наводното мешање на САД и Русија во пресрет на изборите. САД ги отфрлија тврдењата дека се мешаат во бразилските внатрешни работи.