Новата книга на Чарлс Спенсер за принцезата Дијана наводно ги разбеснила кралот Чарлс и принцот Вилијам, бидејќи повторно отвора болни семејни рани и изнесува тешки тврдења за реакцијата на кралот по смртта на Дијана.

Лебедова песна: Дијана, мојата сестра

Книгата „Лебедова песна: Дијана, мојата сестра“ повторно отвори едно од најболните поглавја во историјата на британското кралско семејство – смртта на Дијана и нејзиниот погреб во 1997 година.

Братот на покојната принцеза, Чарлс Спенсер, меѓу другото, тврди дека се судрил со тогашниот принц Чарлс околу одлуката Вилијам и Хари, кои тогаш имале 15 и 12 години, да одат зад ковчегот на нивната мајка.

Особено одекна неговото тврдење дека Чарлс, по смртта на Дијана, за време на телефонски разговор звучел воодушевено, „како добитник на лотарија“. Спенсер тврди и дека за време на нивната расправија Чарлс го загубил трпението и му рекол дека Дијана наскоро ќе биде заборавена.

Бакингемската палата реагираше со ретко јавно соопштение во кое, без директно да ги демантира поединечните тврдења, ја доведе во прашање веродостојноста на сеќавањата на Спенсер.

„Неговото Величество е свесно дека болката поради загубата на сестра може да го замагли расудувањето, да влијае врз проценката и да ги обои сеќавањата на начин што другите не можат да го препознаат, дури и многу години по таква загуба“, порачаа од палатата.

„Според она што го слушам за реакциите во двете домаќинства, владеат фрустрација и гнев, иако од малку различни причини“, изјави за „Фокс њуз диџитал“ кралската коментаторка Кинси Шофилд.

Според нејзиното толкување, кралот особено го погодува тоа што речиси три децении по смртта на Дијана повторно се доведува во прашање неговиот карактер.

„Што се однесува до кралот, мислам дека постои вистински гнев поради нешто што претставува напад врз неговиот карактер речиси 30 години по смртта на Дијана“, објасни Шофилд.

Таа додаде дека Чарлс со децении живее со тоа што дел од јавноста го прикажува како негативец во приказната за неговиот пропаднат брак со Дијана.

„Чарлс со децении живее со тоа што го прикажуваат како негативец во приказната за Дијана. За жал, за него не е ново во туѓа верзија на приказната да биде претставуван како лош човек.“

Кај принцот Вилијам, смета Шофилд, ситуацијата е уште почувствителна бидејќи обвинувањата доаѓаат од неговиот вујко.

„Кај принцот Вилијам постои и дополнително чувство на предавство. Станува збор за неговиот вујко, кој на погребот на Дијана славно вети дека нејзиното ‘крвно семејство’ ќе ги штити Вилијам и Хари.“

Вилијам имал само 15 години кога ја загубил мајка си, а сега, речиси три децении подоцна, повторно јавно се расправа за деновите што следувале по нејзината смрт.

„Вилијам сега мора да гледа како истиот тој вујко повторно отвора некои од најтрауматичните настани од неговото детство и да слуша исклучително штетни обвинувања на сметка на неговиот татко“, рече експертката за кралското семејство.

Таа ја истакна и идната улога на Вилијам во монархијата.

„Тој не е само син на Чарлс. Тој е идниот крал. Монархијата што Спенсер ја напаѓа е институцијата што Вилијам еден ден ќе ја наследи.“

Според нејзиното мислење, принцот би можел да се прашува и кому му користи повторното изнесување приватни разговори стари речиси 30 години и враќањето на јавноста кон најтешкиот период од односот меѓу Чарлс и Дијана.

Британската експертка за кралското семејство Хилари Фордвич исто така тврди дека Вилијам не е близок со својот вујко и дека, според нејзините извори, поради сè е „апсолутно бесен“.

„Неговиот јавен молк на оваа тема е достоен за почит“, рече таа и додаде дека смета оти Спенсер, со повторното отворање на оваа приказна, му нанел болка на Вилијам.

Британската телевизиска водителка и фотографка Хелена Чард ситуацијата зад ѕидовите на палатата ја опиша малку поинаку. Според неа, Бакингемската палата е „потресена, но не паничи“ поради Спенсеровите „вербални гранати директно кон портите на палатата“.

„Стратегијата е јасна: да се остави книгата неколку недели да добива бучен публицитет, а потоа едноставно да се продолжи со работата“, рече таа.

Според нејзините извори, Чарлс истовремено е тажен и лут поради повторното преиспитување на неговото однесување по смртта на Дијана.

„Изворите велат дека кралот Чарлс е тажен, но и лут и дека се чувствува како јагне пред колење, соочен со бескрајни напади врз неговиот карактер. Принцот Вилијам сето ова го погодува уште подлабоко. Траумата повторно се отвора. Помошниците во палатата велат дека тој е фокусиран на јавните обврски и на заштитата на семејството.“

Тврдењата на Спенсер за реакцијата на Чарлс по смртта на Дијана ги оспори и авторот Кристофер Андерсен, кој по нејзината смрт разговарал со бројни извори за својата книга „Денот кога умре Дијана“.

„Сите се сеќаваа дека Чарлс бил целосно скршен. ‘Скршен’ е зборот што постојано го слушав кога го опишуваа моментот кога дознал за смртта на Дијана“, рече Андерсен.

Според неговите извори, реакцијата на Чарлс била сосема поинаква од онаа што сега ја опишува Спенсер.

„Кога Чарлс во Балморал го примил повикот и дознал дека Дијана загинала, еден член на персоналот ми рече дека испуштил крик што звучел како ранета животинка, а потоа почнал да плаче. Други го опишуваа Чарлс како липа додека солзите му се слевале по лицето.“

Андерсен рече дека разговарал и со медицински сестри кои биле во париската болница кога Чарлс го видел телото на поранешната сопруга.

Според нивните зборови, Чарлс се повлекол наназад како нешто да го удрило, а потоа отворено заплакал. Андерсен затоа смета дека луѓето кои тогаш му го опишувале однесувањето на кралот биле уверени дека смртта на Дијана целосно го скршила.

Сепак, тој не ја исклучи можноста Чарлс за време на жестоката расправија со Спенсер да кажал нешто за што подоцна би можел да зажали, особено ако се има предвид притисокот под кој се наоѓало кралското семејство по смртта на Дијана.

Самиот Спенсер не се откажува од своите тврдења. По невообичаено острото соопштение на Бакингемската палата, тој изјави дека ја зборува вистината, а подоцна ја обвини палатата дека се обидува да го прикаже како човек чии сеќавања не се веродостојни.

„Знам што слушнав“, порача тој во интервју за CBS и откри дека за спорната изјава на Чарлс зборувал со други луѓе уште во 1997 година, меѓу кои, според него, била и познатата новинарка Барбара Волтерс.

Спенсер потврди и дека по објавувањето на книгата разговарал со двајцата внуци, Вилијам и Хари, но не сакал да каже дали Вилијам го одобрува тоа што го напишал.

„Не знам. Не ги прашав за одобрување“, рече тој.

Тој објасни и дека членовите на семејството не ги вклучувал во создавањето на книгата, за никој да не може да помисли дека учествувале во нејзиното пишување.

Речиси 30 години по смртта на Дијана, повторно се водат расправи за едно од најболните поглавја во современата британска монархија. Додека Спенсер останува на ставот дека ги запишува сопствените сеќавања и сака да ги исправи, како што тврди, невистините што со години се повторувале, многу обожаватели на кралското семејство застанаа на страната на кралот Чарлс.

Некои од нив потсетија дека токму Спенсер бил тој што не ѝ дозволил на Дијана да се пресели во Алторп по разводот, како и дека седум години не биле во контакт.

Истовремено, имаше и такви кои се потсетија на познатото интервју на Дијана со Мартин Башир за емисијата „Панорама“, нагласувајќи дека токму Спенсер бил тој преку кого Башир, користејќи фалсификувани документи, успеал да ја убеди неговата сестра да го даде интервјуто кое на крајот придонесе за разводот.

Има и такви кои посочуваат дека Спенсер не комуницира со децата од првиот брак и дека неговата најстара ќерка Кити дури и не го поканила на својата свадба.

Според тврдењето на Спенсер, кралицата Елизабета размислувала да ѝ ја врати титулата на Дијана.