Оваа недела, Мили Боби Браун била фотографирана со својата помлада сестра додека напуштале еден италијански ресторан во Лос Анџелес. Нејзините обожаватели останале изненадени од нејзиниот изглед, коментирајќи дека изгледа како да ѝ е врсничка на мајка ѝ.

„Мили навистина изгледа како нечија мајка!“, напишал еден корисник на социјалните мрежи. Друг додал: „Дали таа има 45 или 20 години?“.

Но, Мили Боби Браун не е единствената млада ѕвезда која го следи овој тренд. Инфлуенсерките Ема Чемберлен, Аликс Ерл и Кајли Џенер исто така се „обвинети“ дека изгледаат постаро од своите колешки од милениумската генерација. Експертите велат дека за тоа постојат три причини.

„Премногу се потпираат на естетски третмани“

Естетичарката Кејти Брукс вели дека младите денес се поподложни на естетските трендови од кога било досега.

„Генерацијата Z поминува многу време на ТикТок и Инстаграм, каде што едни со други се ‘инфлуенсираат’ кога станува збор за промените во изгледот. Кога една личност ќе направи некоја естетска процедура, веднаш ја следат многу други. Поради истите третмани, младите денес сè повеќе личат едни на други и тешко е да ги препознаете. Мили Боби Браун е еден од примерите“.

Брукс предупредува дека младите не ја разбираат доволно важноста на негувањето на природната убавина и дека се опседнати со естетиката, под влијание на славни личности како семејството Кардашијан.

„Наместо естетиката да го подобри нивниот изглед, таа всушност ги прави да изгледаат постаро. Премногу филери може да направат лицето да изгледа отечено и неприродно, додека неправилната употреба на силни козметички производи може да ја наруши кожата“.

„Ботоксот и филерите можат да го забрзаат стареењето“

Докторот Маркус Мехта објаснува дека прекумерната употреба на инјекциски третмани може да има спротивен ефект и да направи лицето да изгледа постаро.

„Генерацијата Z порасна со социјалните мрежи, каде што постојано е изложена на филтрирани и обработени фотографии. Тоа создава нереални стандарди за убавина и доведува до прекумерна самокритичност“.

Мехта истакнува дека прекумерната употреба на филери може да доведе до растегнување на кожата и промени на лицето кои не се реверзибилни.

„Во реалноста, повеќето луѓе немаат потреба од филери пред триесеттите години. Прераното вбризгување може да ги наруши природните процеси на стареење и да предизвика долгорочни последици“.

Лошите производи дополнително го нарушуваат изгледот на кожата

Покрај естетските третмани, експертите предупредуваат дека младите често користат премногу силни козметички производи.

„Генерацијата Z често ги следи трендовите во нега на кожа без да го разбира својот тип на кожа. Тоа доведува до прекумерна употреба на силни состојки како ретинол, AHA и BHA киселини, кои можат да ја оштетат заштитната бариера на кожата и да предизвикаат иритации, сувост и пречувствителност“, објаснува Мехта.

Спротивно на тоа, милениумците се посклони кон истражување пред да се одлучат за одредени третмани.

„Милениумците повеќе вложуваат во нега на кожата која поттикнува обновување на клетките и природна еластичност на кожата. Тие сакаат да изгледаат свежо и негувано, но без прекумерни интервенции“.

„Вејп генерација“

Иако милениумците се познати како „велнес генерација“, која помалку пие и пуши, истражувањата покажуваат дека генерацијата Z предничи во користењето никотински производи за вејпинг.

Податоците покажуваат дека 7 отсто од тинејџерите на возраст од 11 до 17 години користат вејп-производи, што е значителен пораст во однос на претходните години.

Пластичниот хирург, д-р Даниел Барет, истакнува дека пушењето, вклучително и вејпингот, може да придонесе за предвремено стареење на кожата.

„Вејп-производите можат да доведат до дехидрираност на кожата и намалување на еластичноста, што го забрзува процесот на стареење. Кога на тоа ќе се додаде и прекумерната употреба на естетски третмани, резултатот е лице кое изгледа постаро отколку што навистина е“.