Погребот на осудениот воен злосторник Ратко Младиќ, кој почина во Хаг додека ја издржуваше доживотната затворска казна за бројни злосторства, ќе се одржи во понеделник, 7 септември, на Топчидерските гробишта во Белград.
Телото на Младиќ во Белград беше пречекано со највисоки воени почести. Како што може да се види на фотографиите објавени од српските медиуми, ковчегот е прекриен со знамињата на Србија и Република Српска.
Како што објавија српските медиуми, комеморацијата ќе се одржи во сабота, 5 септември, во Домот на војската во Белград. Телото на воениот злосторник ќе биде изложено во црквата „Свети Лука“ во населбата Скојевско на Чукарица, во периодот од 9:00 до 12:30 часот.
Сопругата на Младиќ, Босиљка Младиќ, за српските медиуми изјави дека тој ќе биде погребан покрај неговата ќерка Ана.
Српскиот претседател Александар Вучиќ денеска потврди дека телото на Младиќ е преземено од Хаг и особено го нагласи безбедносниот аспект на погребот, на кој, според процените на српските безбедносни служби, се очекуваат десетици илјади луѓе.
Авионот што го превезуваше телото слета околу 18:00 часот на аеродромот „Никола Тесла“ во Белград. Претходно, Меѓународниот механизам за кривични судови во Хаг потврди дека го предал телото.
„Исклучително тешко ќе биде да се обезбеди настанот и на сите да им се гарантира безбедноста. Тоа ќе биде многу важно, бидејќи процените на Безбедносно-информативната агенција, Военобезбедносната агенција, Военоразузнавачката агенција и Министерството за внатрешни работи говорат за десетици илјади присутни“, изјави Вучиќ. Тој додаде дека самата локација на гробиштата претставува голем предизвик за надлежните служби.
„Мораме да ги обезбедиме сите, бидејќи местото на кое ќе се одржи погребот е исклучително тешко за нашите служби. Ќе ги употребиме сите расположливи сили за да им ја гарантираме безбедноста на граѓаните“, рече Вучиќ.
Министерот за правда на Србија, Ненад Вујиќ, претходно изјави дека осудениот воен злосторник Ратко Младиќ ќе биде погребан во Србија со највисоки државни почести.
Поради оддавањето почести на Младиќ, до Србија во последните денови беа упатени предупредувања од највисоки нивоа. Еврокомесарката за проширување Марта Кос нагласи дека Ратко Младиќ е осуден воен злосторник кој издржуваше доживотна казна затвор за геноцид и злосторства против човештвото во Сребреница.
„Величањето на Ратко Младиќ како воен злосторник е спротивно на темелните европски вредности и за тоа нема место во Европската Унија, ниту во земјите кои се стремат да станат нејзини членки. Се надевам дека владата во Белград е свесна што е доведено во прашање“, изјави еврокомесарката.
Исто така, чешкиот европратеник Ондреј Колар изјави дека од еврокомесарката за проширување на Европската Унија, Марта Кос, ќе побара да ја разгледа можноста за прекин на пристапните преговори со Србија поради величањето на осудениот воен злосторник Ратко Младиќ.
