Во Велика Британија, Националната здравствена служба („NHS“) препорачува шест до осум чаши, односно до 1,2 литри течности дневно, со напомена дека вода внесуваме и преку храната.
Медицинскиот факултет на Универзитетот Харвард препорачува четири до шест чаши дневно. Сепак, на интернет најмногу се прошири нешто поекстремната препорака дека дневно треба да се пијат два литри вода, пишува „Science Focus“.
Во 2016 година, идејата дека е покорисно најголемиот дел од течностите да се внесуваат токму преку вода ја оспори д-р Стјуарт Галовеј, вонреден професор по физиологија, физичка активност и исхрана на Универзитетот Стирлинг.
Неговата студија покажа дека различни пијалаци, вклучително и диуретици како лагер-пиво и инстант кафе, не предизвикувале поголема загуба на течности од водата кога се консумираат во вообичаени количини.
Сепак, никој всушност не може да каже колку точно треба да пие секој човек, бидејќи сите имаме различни тела, начин на исхрана и ниво на физичка активност, а тука се и различните услови во животната средина, како топлината, сувиот или влажниот воздух.
Повеќето луѓе можат да препознаат дека им е потребна повеќе вода бидејќи чувствуваат жед, иако тоа чувство слабее со возраста.
Ако не сте сигурни, бројот на одења во тоалет може да биде потенцијално корисен показател за соодветна хидратација кај повеќето возрасни лица, вели Галовеј.
„Тоа ги зема предвид разликите во загубата на течности поради условите во животната средина или нивото на активност, како и разликите во внесувањето течности. Грубо правило би било четири до шест одења во тоалет за мокрење во текот на вообичаен ден, доколку соодветно ги задоволувате потребите на организмот за вода.“
Повеќе од шест мокрења може да значат дека можеби претерувате, додека помалку од четири веројатно значат дека треба да пиете повеќе.
„Овој пристап има одредени недостатоци, како влијанието на промените во функцијата на бубрезите со возраста, одредени лекови или различниот состав на пијалаците, а сето тоа влијае врз концентрацијата и количината на урината“, предупредува тој. „Затоа, ова е само грубо правило, а не прецизен показател.“
Бојата на урината исто така може да биде корисна, вели тој, но со слични ограничувања.
„За да добиете најдобра проценка, не потпирајте се само на еден показател, туку проценката засновајте ја на комбинација од повеќе показатели.“
