Само три дена откако директорот на ЦИА, Џон Ретклиф, ненадејно ја посети Москва, руските стратешки ракетни сили извршија пробно лансирање на интерконтинентална балистичка ракета на цврсто гориво од космодромот Плесецк во Архангелската област, објавува „The Moscow Times“.

Боевите глави ги погодија целите на полигонот Кура на Камчатка. За време на вежбата била преместена и батерија со ракетни лансери, објавува „Kyiv Post“. Беа објавени и дел од снимките од вежбата, но официјалните лица не соопштија кои ракети биле тестирани.

Имено, рускиот арсенал на балистички ракети на цврсто гориво ги вклучува ракетите од типот „Топол“ и „Јарс“, кои имаат дострел од 10.500 километри и можат да стигнат до САД.

Според податоците на Стокхолмскиот меѓународен институт за истражување на мирот („SIPRI“), Русија располага со 78 ракети „Топол“ и 193 ракети „Јарс“, што претставува околу 56 проценти од нејзините стратешки нуклеарни сили.

Се активираше и Лукашенко

Покрај тоа, по заминувањето на Ретклиф од Москва, каде што наводно се сретнал со директорот на Федералната служба за безбедност („FSB“), Александар Бортников, белорускиот претседател Александар Лукашенко нареди проверка на борбената готовност на армијата, распоредувајќи една бригада за извршување борбени задачи.

Лукашенко цела оваа недела престојува во Москва поради разговори за билатералната соработка и актуелните безбедносни прашања. Тој веќе се сретна со премиерот Михаил Мишустин, а му претстои и средба со Владимир Путин, на која двете земји треба да го координираат своето дејствување и да одговорат на заедничките безбедносни предизвици на нивните јужни и западни граници.

Да потсетиме, шефот на ЦИА наводно на својот руски колега му ја претставил проценката за состојбата на руската економија и успешноста на руските операции во Украина. Воедно, ја предупредил Русија да не спроведува провокации насочени против земјите членки на НАТО.

Додека Ретклиф престојуваше во Москва, Путин потпиша три класифицирани декрети поврзани со безбедносни мерки. Деталите засега не се откриени.