„Porsche“ официјално ќе го претстави „911 GT3 Bergsport“ на 1 септември. Станува збор за специјална изведба посветена на возење по кривулести планински патишта и алпски превои.

Проектот е создаден во соработка меѓу претставништвата на „Porsche“ во четири алпски земји: Франција, Италија, Австрија и Швајцарија. Токму овие четири пазари ќе бидат единствените на кои „Bergsport“ официјално ќе се нуди.

Самото име потсетува на лесните тркачки автомобили на „Porsche“ од 1960-тите години, наменети за ридски трки и планински патишта.

За разлика од некогашните „Bergspyder“ модели, кои поради намалување на тежината останувале дури и без покрив, новиот „GT3 Bergsport“ би требало да ја задржи класичната, затворена форма на каросеријата со ветробранско стакло и покрив.

Само 100 примероци

„Porsche“ сè уште не ги откри сите детали за автомобилот, но според досегашните информации, еден од неговите препознатливи елементи би требало да биде задниот спојлер во стилот на „ducktail“. Од стандардниот „911 GT3“ ќе го разликуваат и посебни детали во внатрешноста, вклучувајќи уникатни кожни облоги.

Се очекува под капакот да остане познатиот 4,0-литарски атмосферски шестцилиндричен боксер-мотор од актуелниот „911 GT3“, но „Porsche“ засега официјално не ги потврдил неговите спецификации.

„Bergsport“ притоа не би требало да биде целосно посебен модел, туку специјално обликувана и подесена изведба на „GT3“, чиј карактер е насочен кон возење по кривулестите алпски патишта.

Според досегашните информации, ќе бидат произведени само 100 автомобили. Доколку би биле рамномерно распределени меѓу четирите пазари, секоја земја би добила само околу 25 примероци, иако „Porsche“ засега не објавил како точно ќе изгледа распределбата.

Информациите за автомобилот се појавија и пред официјалната најава, откако деталите накратко биле објавени на австриската интернет-страница на „Porsche“, а потоа отстранети.