Дури и по урамнотежен ручек, заморот може да ве совлада додека седите на работното биро неколку часа подоцна.
Многу луѓе во тој момент посегнуваат по уште една шолја кафе или енергетски напиток.
Сепак, црниот чај би можел да биде подобар избор за зголемување на енергијата и одржување на концентрацијата во текот на попладневните часови.
Црниот чај содржи кофеин – кој ја подобрува будноста – но во помали количества од кафето, а истовремено може да помогне и во одржувањето на концентрацијата.
„Црниот чај може да биде одличен избор за попладневно зголемување на енергијата бидејќи природно содржи кофеин, кој може да ја зголеми будноста и да го намали чувството на замор“, вели нутриционистката Палома Вега.
Иако кофеинот може да помогне кога ни недостига енергија, важно е да внимаваме во кој период од денот го консумираме, наведува порталот „EatingWell“.
„Некои луѓе можат да бидат почувствителни на кофеин во подоцнежните часови од денот, па црниот чај може да обезбеди доволна количина кофеин без да се претера“, додава нутриционистката Јулијана Крими, пренесува „Index.hr“.
Дејството на кофеинот врз организмот може да трае со часови, па затоа е разумно во подоцнежниот дел од денот да се избираат напитоци со помалку кофеин доколку забележите дека тој ви го нарушува сонот.
Една шолја црн чај содржи околу 47 милиграми кофеин, додека истата количина сварено кафе содржи приближно 95 милиграми.
Според тоа, црниот чај содржи приближно двојно помалку кофеин.
