ВМРО-ДПМНЕ најавува отворање на 28 нови директни авиолинии од македонските аеродроми во Скопје и Охрид, со што се цели да се забрза поврзаноста на Македонија со европските и светските дестинации, што ќе влијае позитивно на граѓаните, туризмот и економијата.
Со новите авиолинии, Македонија станува полесно достапна и за граѓаните и за странските посетители. Вкупно се воведени 28 нови дестинации од аеродромите во Скопје и Охрид, велат од ВМРО-ДПМНЕ.
„Најголема корист имаат граѓаните, кои сега имаат повеќе директни опции за патување низ Европа и пошироко.
Од Скопје се воведени директни летови до Париз, Барселона, Лион, Амстердам, Љубљана, Мадрид, Стокхолм, Келн, Бари, Прага, Ларнака, Неапол, Будимпешта, Алгеро и Палермо.
Од Охрид пак, новите линии ги поврзуваат граѓаните со Истанбул, Базел, Ларнака, Мадрид, Штутгарт, Бари, Стокхолм, Катовице, Вроцлав, Милано, Братислава и Виена.
Подобрата поврзаност е важна и за економијата. Поголемиот број директни линии може да придонесе за развој на туризмот, особено во Охрид, но и за полесно поврзување на домашните компании со странски партнери и пазари.
Проширувањето на авиомрежата е дел од заложбите на Владата предводена од ВМРО-ДПМНЕ за поголема мобилност, повеќе можности и посилно поврзување на Македонија со Европа и светот“, стои во соопштението на ВМРО-ДПМНЕ.
