Извршната асистентка на американскиот претседател, Натали Харп, со години е една од најблиските помошнички на Доналд Трамп, а деновиве се најде во центарот на вниманието на јавноста поради шпекулациите за природата на нејзиниот однос со претседателот. Среде дебатата за нивниот однос, во јавноста испливаа интимни писма што ги напишала Натали, во кои открива дека се изгладнувала додека работела за него.
Харп на американската јавност ѝ е позната и под прекарот „човечки печатач“, а тоа е затоа што за време на претседателската кампања на Трамп во 2024 година со себе носела пренослив печатач за во секој момент да може да му испечати новинарски текстови што би можеле да го интересираат. Сепак, нејзината посветеност кон американскиот претседател предизвикала загриженост кај главните советници и Тајната служба.
Една од ситуациите што го зголемила нивото на загриженост се случила во мај 2023 година, за време на неговото патување во Шкотска. Харп тогаш трчала покрај голф-количката на Доналд бидејќи немало други достапни возила. Потоа му напишала писмо за да му се извини што го посрамила додека се обидувала да го следи неговото темпо.
„Исто така, ми е жал ако беше непријатно тоа што одев по теренот во Шкотска“, напишала таа во писмото што „Daily Mail“ го објави во февруари минатата година. Преписката повторно го привлече вниманието на јавноста откако деновиве повторно ја објави „The New York Times“.
Харп во продолжението на комуникацијата открила дека се изгладнувала, како и дека заборавала да спие додека работела за Трамп. „Сакам меѓу нас секогаш сè да биде во ред. Исто така, знам дека цела недела бев расеана (заборавав да јадам во текот на денот, па дури и заборавав да спијам, така што спиев само по неколку часа одеднаш)“, додала Харп. Писмото го завршила со зборовите: „Со сето мое срце, Натали“.
Потегот на Натали од октомври 2023 година, исто така, го привлече вниманието на јавноста. Харп тогаш се возела во багажникот на теренско возило откако ѝ било кажано дека за неа нема место во колоната автомобили што го следела Трамп до судот во Њујорк. Натали, откако ѝ било кажано дека нема место во возилото, наводно била исклучително лута, па почнала да им вика на вработените, инсистирајќи дека Трамп лично ја замолил да го следи.
Исто така, Харп во текот на летото 2023 година спиела во женската соблекувална на голф-клубот на Трамп за да може да остане блиску до него. Како што тврди новинарот Мајкл Волф, таа првично престојувала во соба за слугинки, но се преселила во соблекувалната бидејќи била поблиску до главната куќа, што ѝ овозможувало побрзо да реагира секогаш кога Трамп ќе се јавел.
За време на кампањата на Трамп, наводно, Натали се нашла во неговите приватни простории во Мар-а-Лаго, во делот во кој обично е забранет пристап за сите надвор од семејството, каде што на неа наишла Меланија Трамп. Харп наводно му доставувала документи на претседателот бидејќи не сакала да чека до утрото.
Иако нејзината посветеност им пречи на многумина од тесниот круг на претседателот, советниците тврдат дека Трамп „ја сака нејзината посветеност и фактот што е 100 отсто лојална“. „Таа не преиспитува, не се двоуми“, рекол изворот.
Односот меѓу Трамп и Харп се најде во центарот на вниманието на јавноста во јули, кога заедно присуствуваа на самитот на НАТО во Турција. Претседателот тогаш добил закани од Иран, па одлучил дел од своите помошници да ги изведе од земјата со воен авион. Меѓу нив била и Харп, што предизвикало жестоки политички реакции, пред сè затоа што другите помошници на Трамп, вклучувајќи го и државниот секретар Марко Рубио, биле оставени во авионот што служел како мамка.
Посебно внимание предизвика изјавата на демократскиот сенатор Џон Ософ, кој на предизборен собир во неделата рече дека претседателот повеќе сака „да патува со Натали во нивната наводно незаштитена летечка палата“ отколку да си ја врши работата.
Односот на Трамп со Харп предизвикал незадоволство и кај членовите на нејзиното семејство. Нејзиниот отуѓен брат Престон пред неколку месеци го опишал нејзиниот однос со претседателот како „многу нездрав“, а Трамп го нарекол „национална срамота“.
