Споменикот е висок 55,6 метри, сметано од нивото на земјата до неговата највисока точка. Изграден е во местото Конотопје, а го финансирале брачната двојка Гражина и Роман Каркосик, за кои, според „Euronews“, статуата претставува „личен завет на благодарност за повторно стекнатото здравје и живот“.

Со својата височина оваа статуа го надминува и познатиот споменик на Христос Спасителот во Рио де Жанеиро, кој заедно со постаментот е висок 38 метри. Повисока е и од статуата на Христос Кралот на Вселената во Швебоџин во Полска, која заедно со ридот на кој се наоѓа достигнува височина од 52,5 метри.

Поглед кон небото

Според „Vatican News“, статуата ја прикажува Богородица на Милосрдието и се наоѓа во близина на капела посветена на Богородица на Жалоста, која претставува место за аџилак.

На ова за време на обредот на благословувањето се осврна и монсињор Вентковски, кој рече дека местото на кое се наоѓа споменикот „не е какво било место; тоа е место осветено со молитвите на аџиите“.

Споменикот е изработен според проектот на скулпторот Адам Јакуб Матејковски. Постаментот е опкружен со осум столбови во форма на круна. Аџиите можат да се искачат и на терасата која се наоѓа на височина од 15,3 метри, од каде што се издигнува самата статуа на Марија.

Во својата проповед епископот ја нагласи важноста од насочувањето на погледот кон небото, особено во денешно време кога многу луѓе „го држат погледот насочен само кон земјата и се фокусирани исклучиво на себеси“.

Говорејќи за името на новата скулптура, монсињор Вентковски потсети на света Фаустина Ковалска, на која Христос ѝ го објавил своето Божествено Милосрдие. Света Фаустина е родена во местото Швинице Варцке, исто така на подрачјето на Влоцлавек, каде што била крстена и ја примила својата прва света причест.

„Овде во Конотопје, Марија, во ликот што го гледаме, нè прифаќа сите нас, се наведнува кон нас и ги шири своите раце за да нè повика да го кренеме погледот кон височините, кон Бога и кон небото“, рече епископот Вентковски.

Втора највисока статуа на Богородица во светот

Обредот започна со молитва на светата бројаница, а заврши со спектакуларна глетка: од два хеликоптера кои прелетувале над споменикот биле фрлани ливчиња од црвени рози.

Новата скулптура на Пресвета Богородица во полското Конотопје, висока 55,6 метри, сега е втората највисока статуа на Богородица во светот, веднаш зад монументалната скулптура „Mother of All Asia“ на Филипините, која достигнува височина од околу 98 метри.